Kryeparlamentarja Lindita Nikolla ka zhvilluar sot një vizitë zyrtare në Turqi, ku u prit nga presidenti Recep Tayyip Erdogan. Gjatë takimit në Pallatin Presidencial, Nikolla shprehu mirënjohjen e thellë për bashkëpunimin mes dy vendeve në fushën ekonomike dhe atë të forcave ushtarake. Ndërsa shprehet se Erdogan i ka garantuar që do të thellohen bashkëpunimet mes dy vendeve, madje do të lobojë edhe në njohjen e Kosovës nga Serbia.
“Për rolin, angazhimin dhe kontributin personal të Presidentit Erdogan në forcimin e mëtejshëm të marrëdhënieve dhe partneritetit strategjik midis të dyja vendeve. Ne gjithashtu vlerësojmë dhe ju falënderojmë për rolin e Turqisë si lobuese e fuqishme në njohjen e Kosovës në arenën ndërkombëtare, zërin e fuqishëm të Turqisë në NATO për institucionalizimin e marrëdhënieve me Kosovën, si një premisë drejt paqes e stabilitetit në Ballkanin Perëndimor, dhe do të dëshironim angazhimin e Turqisë edhe në ndalimin e fushatës së Serbisë për tërheqjen e njohjes së Kosovës nga disa shtete”, ka thënë Nikolla.
Presidenti Erdogan rikonfirmoi vendosmërinë për mbështetjen e pakursyer për Shqipërinë, zgjerimin e bashkëpunimit dypalësh dhe të partneritetit strategjik midis Shqipërisë dhe Turqisë dhe dha lajmin e mirë se do të vijë personalisht në Shqipëri për inaugurimin e apartamenteve të banimit për familjet e Bashkisë së Kurbinit të dëmtuara nga tërmeti i 26 nëntorit.
Discussion about this post