Kryetari i Partisë Demokratike, Sali Berisha ka marrë pjesë në takimin e organizuar në selinë blu nga FRPD dhe grupimi ‘Dhjetor ‘90’ në kuadër të ‘8 Dhjetorit’, Ditës së Rinisë. Berisha kujtoi si nisi lëvizja më e madhe qytetare që rrëzoi diktaturën në Shqipëri. ‘Revolucion studentor i 1990, përzuri edhe Beogradin i cili në fakt, në çdo kohë dhe rrethanë diktonte politikën e Tiranës’, theksoi ai.
Kryedemokrati u shpreh se lëvizja e studentëve në 1990 ishte një lëvizje ku bijtë dhe bijat firmosën kundër pushtetit të etërve të tyre. Duke kujtuar orët e para dhe ato që pasuan zhvillimet e atyre ditëve që filluan më datë 8 dhjetor, Berisha u ndal te udhëheqësi i studentëve, Azem Hajdari, “i cili u betua mes tyre se nuk do t’i tradhtonte asnjëherë dhe një gjë e tillë mund të ndodhte vetëm kur ai të vriste fëmijët e tij, Kirin dhe Rudinën”.
Lideri i opozitës ka cituar Ronald Regan për situatën e rëndë në të cilën ndodhet Shqipëria sot, i cili është shprehur se ‘duhet një gjeneratë për tu zhdukur demokracia’. ‘E ka thënë Ronald Regan, duhet një gjeneratë për tu zhdukur demokracia. Ja ku jemi, pas 34 vitesh ne jetojmë përsëri në diktaturë’, u shpreh Berisha gjatë takimit me FRPD dhe grupimin ‘Dhjetor ‘90’ në selinë blu.
Berisha akuzoi kryeministrin Edi Rama, se njëjtë si Enver Hoxha nuk e do Kosovën. ‘Historia përsëritet, si Enver Hoxha që nuk e donte Kosovën Republikë, edhe Edi Rama është kundër saj’, theksoi.
Kryetari i Partisë Demokratike u ndal edhe te tre rezolutat ndërkombëtare, CDI, PPE dhe IDU, ku Edi Rama cilësohet narkodiktator, i cili përdor drejtësinë për të sulmuar drejtuesit e opozitës. ‘Mbështetja është një detyrim madhor për ne, për të përmbushur misioni tonë, ndarjen e Shqipërisë nga kjo diktaturë’, theksoi Berisha në fund të fjalës së tij.
Discussion about this post