Trajneri i Barcelonës, Hansi Flick, foli në konferencën e zakonshme për shtyp, në prag të sfidës me Borussia Dortmund, në Ligën e Kampioneve. Tekniku i katalanasve tha se do të luhet në një atmosferë të shkëlqyer, referuar stadiumit “Signal Iduna Park”.
Flick theksoi se beson te fitorja e skuadrës së tij në Gjermani, ndërsa shtoi se ekipi i ka treguar cilësitë që ka në përbërje.
“Do të luajmë në një stadium fantastik me një atmosferë të jashtëzakonshme. Tifozët na kanë mbështetur shumë gjatë sezonit dhe kjo është diçka nga e cila ne duhet të përfitojmë. Do të jetë një motiv shtesë. Ne kemi treguar cilësitë që kemi, unë kam besim të plotë tek ekipi dhe në atë që po bëjmë. Të gjithë japin maksimumin në çdo seancë stërvitore. Duhet të kemi besim dhe të luajmë siç dimë ne. Janë disa situata që duhet t’i korrigjojmë. Dy pikët e humbura në kampionat, na lënduan, por unë jam i bindur se mund të bëjmë gjëra të mëdha si ekip i bashkuar.
Besoj te fitorja ndaj Dortmund me një lojë të mirë. Janë tre pikë të rëndësishme për raundin tjetër. Ne kemi luajtur shumë ndeshje, në të cilat kemi treguar vlerat që kemi si ekip. Kemi treguar se çfarë jemi të aftë të bëjmë dhe se mund të përballemi me ekipe të vështira. Është një ndeshje e komplikuar, por nëse japim gjithçka do ia dalim ta kalojmë me sukses. Liga e Kampioneve është tjetër nivel, ne duam pikët për të synuar kualifikimin për më tej”, deklaroi Flick.
Ndeshja Borussia Dortmund-Barcelona, do të luhet këtë të Mërkurë, nga ora 21:00.
Discussion about this post