Sërish sherr në shkollë, plagoset me thikë 17-vjeçari në Fier -

Vala e dhunës në shkolla vijon. Rasti i fundit është shënuar në shkollën e mesme në Cakran të Fierit, ku një 17-vjeçar është plagosur me thikë në vazhdën e një konflikti me një bashkëmoshatar.

“Rreth orës 08:30, në fshatin Cakran, Fier, në ambientet e shkollës së mesme Cakran, gjatë një konflikti të çastit mes dy nxënësve, njëri prej tyre shtetasi, B. D.,17 vjeç, ka goditur me mjet prerës në krah bashkëmoshatarin shtetasin Y. Xh, të (dy nxënës të kësaj shkolle)”, njoftoi policia.

“Shtetasi Y.Xh., u transportua në spitalin Rajonal Fier, për ndihmë mjekësorë, jashtë rrezikut për jetën. Ndërkohë shërbimet e Policisë kanë kapur dhe shoqëruar, në Komisariat për veprime të mëtejshme shtetasin B.D, si dhe kanë sekuestruar në cilësinë e provës materiale mjetin prerës (thikë). Grupi hetimor po punon për sqarimin e plotë të rrethanave të rastit”, thuhet më tej në njoftimin e bluve.

Prokurorja e çështjes, Oliana Gjergjefi ka pohuar për mediat se janë marrë dëshmitë e dy mësueseve që kanë qenë të pranishme gjatë momentit të konfliktit ndërkohë që është bërë kqyrja e vendit të ngjarjes. “Kemi pyetur dëshmitarët okularë. Dy mësuese të cilat kanë qenë të pranishme gjatë konfliktit. Ngjarja është e rëndë. Garantojmë hetim të plotë e të gjithanshëm”, tha ajo.

Drejtori i qendrës shëndetësore Cakran , Tonin Xhelaj, në një intervistë për mediat ka pohuar se i mituri i dëmtuar është paraqitur për ndihmë mjekësore i shoqëruar nga shokët teksa dhe se ka marrë 4 plagë. “E sollën këtu mësues dhe nxënësit,shokë e vet. Ishte me pak hemoragji nga krahu I majtë. Ishte goditur me mjete prerëse. Kishte hemoragji, iu ndalua dhe është jashtë rrezikut për jetën. Më pas u nis për mjekim të specializuar në spitalin e Fierit”, tha ai.

Ndërkohë, prindër të fëmijëve që shkojnë në shkollën e Cakranit, kanë pohuar për mediat se situata dhune në këtë institucion ka pasur edhe më parë. Sipas tyre, nxënësin jo vetëm që janë përleshur me njeri-tjetrin, por “kanë rrahur edhe mësuesit”.

Babai i të plagosurit bëri thirrje institucioneve të marrin masa për sigurinë, teksa u shpreh se kjo nuk është hera e parë që ndodhin krime të tilla nëpër institucione arsimore.

“U nisa për në punë me gjithë familjen, ndërsa djali shkoi në shkollë në orën 8:00. Sapo mbërrita në vendin e punës, më mori në telefon mësuesja kujdestare dhe më tha se djalin ma kishin qëlluar. Shkova menjëherë në spitalin e fshatit, por gjendja ishte e rëndë, e çuam direkt në spitalin e Fierit. E mbajtën dy orë në sallën e operacionit dhe sapo ka dalë prej aty. Kërkoj që shteti të marrë masa! Nuk është hera e parë që ndodh një fenomen i tillë. Dua drejtësi për djalin tim dhe që masat e sigurisë të shtohen në të gjitha shkollat e vendit”, tha babai i adoleshentit.

Një sërë krimesh kundër jetës janë shënuar në vend që prej nisjes së vitit shkollor në shkollat e vendit apo me protagonistë nxënës. Ngjarja më e rëndë ishte ajo e ndodhur disa javë më parë pranë shkollës “Fan Noli” në Tiranë, ku u vra me thikë një 14-vjeçar dhe u plagos një tjetër.

Ngjarja shkaktoi indinjatë në opinionin publik dhe disa protesta u zhvilluan me prindër që kërkuan reformim të sistemit arsimor. Një interpelancë u zhvillua dje në Kuvend lidhur me çështjen, ku ministrja e Arsimit përmendi disa prej masave të marra për rritjen e sigurisë. Megjithatë, ngjarje të tilla vijojnë të ndodhin.

Lexo edhe: