Opozita do të protestojë të hënën më 23 Dhjetor, duke bllokuar disa rrugë të kryeqytetit.
Burime pranë selisë blu thanë se duke nisur nga ora 17:00, akset që do të bllokohen do të jenë rruga pranë Bashkisë së Tiranës, rreth-rrotullimi tek “Zogu i Zi”, tek sheshi “Willson”, tek “Pallati me Shigjeta”, si dhe kryqëzimi tek “Rruga e Elbasanit”, pranë xhamisë së “Namazgjasë”.
Më herët, kryetari i Partisë Demokratike Sali Berisha ka thënë se protesta e 23 Dhjetorit do të bllokojë Tiranën. Kryedemokrati e konsideroi si “mosbindjen civile më të fuqishme që ka parë Tirana ndonjëherë”.
Protesta pritet të zgjasë rreth tre orë.
Organizatorët e protestës kanë njoftua policinë lidhur me planin e tyre. Ndërkohë, mësohet se policia u ka kthyer përgjigje se garanton çdo tubim paqësor, por jo bllokimin e rrugëve duke ju kujtuar organizatorëve se do të mbajnë përgjegjësi penale për çdo bllokim.
Më herët, Partia Demokratike ka zhvilluar edhe disa protesta të ngjashme me bllokim rrugësh.
Përveç një akti të mosbindjes civile – siç i ka cilësuar opozita, protesta të tilla janë parë me skepticizëm nga qytetarë të Tiranës, të cilët janë penguar në lëvizjen e tyre të lirë për shkak të bllokimeve të opozitës.
Kritika ka pasur edhe ndaj policisë që ka lejuar bllokimet.
Discussion about this post