Një ngjarje tronditëse ka ndodhur në orët e para të mëngjesit në fshatin Metoq të Sarandës, ku Elvira Tahiraj, 49 vjeç, dyshohet se ka vrarë bashkëshortin e saj, Llazar Tahiraj, 55 vjeç. Autorja e dyshuar e ka goditur viktimën me sopatë në kokë, ndërsa ai ishte në gjumë.
Çifti Tahiraj kishte tre vajza, dy prej të cilave janë të martuara. Sipas informacioneve paraprake, Elvira Tahiraj dyshohet se vuan nga çrregullime mendore, çka mund të ketë ndikuar në kryerjen e këtij akti ekstrem. Ngjarja ka tronditur jo vetëm familjen, por edhe komunitetin e qetë të fshatit Metoq.
Policia mbërriti menjëherë në vendngjarje dhe shoqëroi Elvira Tahirajn në ambientet e Komisariatit të Sarandës. Grupi hetimor, nën drejtimin e Prokurorisë, po punon intensivisht për të zbardhur motivet e krimit dhe për të dokumentuar ligjërisht ngjarjen.
Raportohet se kohët e fundit, Elvira, e njohur si Vila, kishte probleme, zënka dhe konflikte me banorët e lagjes. Nga ana tjetër, bashkëshorti i saj Llazari, përpiqej ta qetësonte dhe kujdesej për të, pasi ajo ishte shkëputur edhe nga puna.
Lidhur me ngjarjen e rëndë, një nga banorët e fshatit rrëfen si e ka njohur çiftin.
Ai tregon se gruaja ka qenë me probleme të shëndetit mendor, ndërsa bashkëshorti i saj i vrarë punonte i vetëm për të mbajtur shtëpinë.
‘Punonte i shkreti, ku i dilte puna ditë për ditë. Gruaja ka qenë e ikur. Ai nuk pi alkool. Ai ishte punëtor i shkreti, as alkool asgjë, me qira rri. Gjynah mavri. Ajo është me të meta. Këta janë nga Korça, nga fshatrat e Korçës. Ka qenë në gjumë mavria. I thosha ik, se qe me të meta ajo po qe edhe me sëmundjen e tokës. Gjynah, ka qenë burrë i mirë shumë, i dashur me njerëzit.’
Discussion about this post