Kryeministri Edi Rama ka nisur konferencën e fundvitit me gazetarët, ku fillim të fjalës së tij, tha se kriza energjetike që ka përfshirë Europën pritet të na ndikojë edhe ne, duke theksuar se ka një projeksion që të përfundojë në qershor të vitit 2022, megjithatë sipas tij ende kjo nuk është tërësisht e qartë.
Rama theksoi se nuk do të ketë rritje të çmimit për konsumatorët familjarë, pavarësisht krizës energjetike në Europë, ndërsa konfirmoi se do të ketë një paketë ndihme edhe për bizneset që iu është kërkuar që të dalin në tregun e lirë për të blerë vetë energjinë.
“Kriza energjetike po sfidon gjithë botën. Çmimi i energjisë ka shkuar në 450 euro për MGË. Po të keni parasysh totalin vjetor kemi lëvizur me një mesatare prej 50 euro. Ndërkohë që kjo krizë të cilën unë e kam paralajmëruar disa kohë më parë, dhe u komentua si një alarm flas, nuk duket se ka fund të qartë, është folur për qershorin, por askush sot nuk mund ta konfirmojë këtë fakt apo hipotezë, ndërkohë që kompleksiteti i krizës shkon nga gjeopolitika tek efektet e ndryshimeve klimaterike. Ne ndërkohë që vendet rreth e rrotull, kanë rritur çmimet për konsumatorin, ne i kemi qëndruar një ideje fikse se do t’u bëhemi mburojë konsumatorëve familjarë dhe biznesit të vogël. Do të ketë një rritje eksponenciale për bizneset e mëdha, dhe ne po përgatisim një skemë lehtësuese. Pse po ja dalim të qëndrojmë në këto parametra pasi e kemi adresuar krizën me një reformim të skemës së furnizmit. Jemi besimplotë, se deri në qershor, ndërkohë që parashikojmë edhe një efekt lehtësues, rreth muajve mars-prill. Do të vazhdojmë që t’i mbrojmë konsumatorët familjarë”, tha Rama.
Discussion about this post