Në konferencën sotme me mediet, Kryeministri Edi Rama ka dhënë më shumë detaje mbi planet që ka qeveria për të frenuar përhapjen e koronavirusit. Ai tha se kriza e pandemisë është një ndër sfidat me të cilat është përballur vendi dhe bota gjatë këtij viti, prandaj ka kërkuar nga qytetarët që të respektojnë masat kufizuese, për të mos përfunduar si shtet që janë rikthyer në karantinë.
“Kriza tjetër ajo e pandemisë është një krizë në vazhdim, dhe besoj që deri më tani ja kemi dalë arsyeshëm duke garantuar një jetë të çliruar nga shtrëngesat dhe duke i dhënë mundësi ekonomisë që të fluturojë për t’u ringritur nga humnera që ishim vitin e kaluar. Dua të theksoj se sot jemi në kushtet kur duhet të përgatitemi për një valë të re pandemike për shkak të virusit që po mbyll vendet e tjera. Holanda është mbyllë deri më 14 mars”, tha ai.
Gjithsesi, kryeministri paralajmëroi që nëse situata agravohet qeveria do detyrohet të ashpërsojë masat. Ndërsa tregoi më tej se do hapet një spital i ri infektiv për të prekurit nga Koronavirusi.
“Ne nuk do të ngutemi por duhet ta dimë se nuk mundet dot sikur nuk ndodh asgjë dhe disa masa do të duhen rimarrë pa e shtrënguar zinxhirin e jetës dhe të ekonomisë siç e kemi parë. Paralelisht kemi garantuar të gjithë dozat e vaksinave, procesi ecën por jo siç duhet. Kemi bërë një vlerësim dhe rezulto dhe shumë qytetarë janë vaksinuar jashtë, jemi gati për spitalin e ri infektiv, që do të thotë rindërtim nga themelet i spitalit ekzistues dhe modernizim të tij, dhe kemi 56 autoambulanca të reja që garantojnë një shërbim të standartëve evropiane”, ka thënë Rama, duke bërë edhe njëherë thirrje që qytetarët dhe bizneset të respektojnë masat anticovid në natën e ndërrimit të viteve.
Discussion about this post