Deri disa vite më parë, Farka shquhej si një fshat në periferi të Tiranës i zgjedhur nga qytetarët për të kaluar disa kohë në gjelbërim dhe pranë liqenit. Megjithatë, siç ka ndodhur rëndom gjatë qeverisjes “rilindase”, edhe kjo zonë u prek nga vrulli i ndërtimeve.
Nëse një kafe në barin modest mbi kodër dhe me pamje nga liqeni shijohej ndryshe në qetësinë e natyrës, më vonë situata ndryshoi. Qetësinë e mbyti zhurma e fadromave dhe pluhuri i ngritur nga makineritë e rënda. Firmat e ndërtimit asgjësuan gjelbërimin dhe vendin e zuri betoni.
Një biznes fitimprurës në kurriz të natyrës.
Dhe e gjithë kjo, “batërdi me ndërtime” siç mund ta konsiderojë shumëkush, ndodhi me firmë e kryebashkiakut të Tiranës Erion Veliaj, përgjegjës për dhëniet e lejeve për ndërtim.
Ajo që ngjau në Farkë shkon paralel me panoramën brenda kryeqytetit. Ndërtimet dhe kullat kanë mbushur Tiranën duke sakrifikuar hapësirat e gjelbërta, mungesa e të cilave perceptohet si një nga problemet më të mprehta për cilësinë e jetës të banorëve të Tiranës. Të dhënat e INSTAT flasim për shifra rekord të ndërtimeve, ndërsa çmimet e banesave janë rritur duke u barazuar me ato në kryeqytetet europiane – fenomen ky që për ekspertët i atribuohet parasë së pistë që qarkullon në masë.
Arkitekti i kësaj rrumpalle urbanistike është kryebashkiaku i Tiranës që prej 2015-ës dhe shefi i tij politik Edi Rama, njëkohësisht kreu i Këshilli Kombëtar të Territorit.
Megjithatë, betonizimin dhe vrasjen e natyrës, të dy e cilësojnë pozitive. Madje, Veliaj shfaqet edhe si ithtar i gjelbërimit teksa poston në rrjetet sociale pamje duke mbjellë pemë, në kuadër të agjendës së propagandës.
“Mbi 300 pemë iu shtuan Tiranës”, shkroi Veliaj të martën në një postim në “FB”. Propagandën gjithsesi e tradhton realiteti, teksa në sfond të kryebashkiakut me lopatë në dorë, në kodrën mbi liqenin në Farkë, shquhen ndërtimet që kanë zaptuar zonën e gjelbër.
Discussion about this post