Ky është momenti që sapo është çarë diga e hidrocentralit të Bunecit, në Bashkinë Himarë.
Nga pamjet e filmuara nga banorët e zonës, duket sasia e lartë e ujit që vërshon më pas mbi banesa dhe biznese.
Banorët në video shihen në panik, megjithëse janë larg, teksa bëjnë thirrje për lajmërim të strukturave dhe banorëve që gjenden aty pranë për të shmangur humbjet fatale.
Sipas informacioneve nga banorët e zonës ka rikthim të energjisë elektrike në fshatrat Borsh, Piqeras, Lukovë, Bunec, Shën Vasil, Fterrë, Nivicë. Është larguar uji prej nën stacionit të Bunecit që furnizonte me energji këto fshatra teksa është ndalur dhe rrjedhja e ujit në digë.
Gjithashtu, Policia e Vlorës dhe Prokuroria kanë nisur hetimet për rastin në fjalë. Janë marrë të gjitha provat në vendngjarje që mund të çojnë në zbulimin e faktorëve përse çuan në çarjen e digës. Hetim ka nisur edhe nga prokuroria, teksa pritet që të merren në pyetje edhe përgjegjësit që realizuan projektin vite më parë.
Dy janë pistat kryesore përse mund të jetë çarë diga: punimet pa cilësi si dhe mbingarkesa me ujë mbi kapacitetin e saj, si rrjedhojë e prurjeve të larta.
Ndërkohë, prefektura e Qarkut të Vlorës thotë se janë 12 biznese të prekura totalisht nga vërshimi i ujit.
Bëhet fjalë për biznese sezonale që ndodhen në plazhin e Bunecit. Ndërkohë, dy banesa janë prekur në pjesën e bodrumeve duke u shkaktuar aty disa dëme materiale, si dhe në oborre e ambientet përreth.
Për saktësim, Prefektura e Vlorës thotë se pjesa që u ça ka qenë muri ballor i një ujëmbledhësi me sasi 15 mijë metër kub, ujë i cili në rast të prurjeve të pakta në thatësira të përdorej uji i tij për prodhimin e energjisë. Është ndërtuar në vitin 2010, kohë kur ka përfunduar së ndërtuari.
Discussion about this post