Netanyahu konfirmon arritjen e marrëveshjes Izrael-Hamas

Zyra e kryeministrit Benjamin Netanyahu ka konfirmuar se ekipet negociuese për qeverinë izraelite dhe për organizatën militante palestineze Hamas kanë arritur marrëveshjen e armëpushimit në Rripin e Gazës, e cila përfshin lirimin e pengjeve.

“Kryeministri Benjamin Netanyahu është informuar nga ekipi negociator se është arritur marrëveshja për lirimin e pengjeve”, tha sot në mëngjes zyra e kryeministrit në një postim në X.

Netanyahu nuk e kishte konfirmuar ende marrëveshjen, të njoftuar të mërkurën nga ndërmjetësi i Katarit, duke thënë se disa detaje të kërkesave kishin mbetur të pazgjidhura.

“Kryeministri ka thirrur sot një mbledhje të kabinetit të sigurisë për të zhvilluar një votim per marrëveshjen”, tha zyra e tij.

“Kryeministri ka urdhëruar gjithashtu Koordinatorin për Pengjet dhe të Zhdukurit që të koordinojë përgatitjet për të pritur pengjet pas kthimit të tyre në Izrael. Shteti i Izraelit është i përkushtuar për arritjen e të gjitha objektivave të luftës duke përfshirë kthimin e të gjithë pengjeve tona, të gjallët dhe të vdekurit”, thuhet në njoftim.

Marrëveshja, fillimisht ishte vendosur të hynte në fuqi të dielën në orën 11:15.

Marrëveshja, e arritur pas disa muajsh negociatash indirekte, përfshin një proces shumëfazor që synon t’i japë fund luftimeve në Rripin e Gazës dhe të sigurojë lirimin e pengjeve të rrëmbyera nga Hamasi, si dhe lirimin e të burgosurve palestinezë që mbahen në Izrael.

Ndërsa miratimi i marrëveshjes nga kabineti i sigurisë dhe qeveria konsiderohet i sigurt, ministri izraelit i Sigurisë Kombëtare të ekstremit të djathtë, Itamar Ben-Gvir ka paralajmëruar se do të largohet nga qeveria e koalicionit të Netanyahut nëse ajo pajtohet me të.

Ministri i Financave Bezalel Smotrich, kreu i partisë së Sionizmit Fetar, mund të kundërshtojë gjithashtu marrëveshjen e armëpushimit.

Nëse Ben-Gvir dhe ndoshta Smotrich do të dilnin nga koalicioni, Netanyahu do të humbiste shumicën e tij qeveritare në parlament.

Udhëheqësi i opozitës, Yair Lapid ka njoftuar tashmë se do të ishte i gatshëm t’i siguronte Netanyahut një “rrjet sigurie” në parlament për një marrëveshje pengjesh në një rast të tillë.