Shqipëria po përballet me një krizë të thellë financiare, e cila po e vështirëson gjithnjë e më shumë jetesën për qytetarët. Të dhënat e fundit nga Banka e Shqipërisë tregojnë një realitet alarmant: 35% e shqiptarëve nuk arrijnë ta mbyllin muajin pa marrë borxh, ndërsa vetëm 18% mund të kursejnë diçka nga të ardhurat e tyre mujore.
Situata bëhet edhe më dramatike kur analizohen aftësitë e qytetarëve për të përballuar shpenzime të papritura. Vetëm 41% e të anketuarve kanë mundësinë të mbulojnë një shpenzim të madh pa kërkuar hua, një përqindje shumë më e ulët se mesatarja e vendeve të OECD-së, e cila arrin në 62%. Kjo tregon se një pjesë e madhe e familjeve shqiptare janë vulnerabël dhe të ekspozuara ndaj krizave financiare.
Sipas raportit të Bankës së Shqipërisë, vetëm 65% e qytetarëve kanë të ardhura të mjaftueshme për të mbuluar shpenzimet mujore pa marrë borxh. Ndërkohë, të dhënat e INSTAT zbulojnë se 19.7% e familjeve shqiptare, ose rreth 545 mijë qytetarë, jetojnë në kufirin e varfërisë. Për të mos u konsideruar i varfër, një individ duhet të ketë minimalisht 22,547 lekë të ardhura mujore.
Dallimi mes Shqipërisë dhe vendeve të zhvilluara të BE-së është i dukshëm. Në vendet e OECD-së, 44% e qytetarëve arrijnë të mbyllin muajin me një bilanc pozitiv, ndërsa në Shqipëri ky tregues është vetëm 18%.
Kjo tregon se shqiptarët jo vetëm që përballen me vështirësi të përditshme ekonomike, por gjithashtu nuk kanë mundësi të ndërtojnë një stabilitet financiar afatgjatë. Nëse nuk merren masa urgjente për të rritur të ardhurat dhe për të përmirësuar mirëqenien sociale, situata mund të përkeqësohet edhe më tej, duke shtuar varfërinë dhe pasigurinë ekonomike për mijëra familje shqiptare.
Discussion about this post