Një vilë madhështore, dikur simbol i luksit, tashmë është një kujtesë e frikshme e fuqisë së natyrës në Cape Cod Bay. Shtëpia me sipërfaqe 5100 metra katrorë ndodhet në prag të shembjes, ndërsa erozioni ka arritur deri te themeli i saj, duke e lënë atë pezull mbi një shkëmb 25 metra të lartë.
Në të kaluarën, vila kishte një kuvertë të madhe dhe një vaskë me hidromasazh që ofronin pamje mahnitëse të oqeanit,. Sot, mbrojtja e saj e fundit janë disa dërrasa të holla prej druri, që mezi e ndajnë ndërtesën nga rënia e pashmangshme.
Ish-pronari i saj, i vetëdijshëm për fatin e vilës, kishte nisur prishjen e pjesshme të saj përpara se të hiqte dorë plotësisht. Shtëpia u shit më pas një kompanie shpëtimi, e cila nuk ka ndërmend të shpenzojë asnjë qindarkë për të shmangur katastrofën.
Autoritetet e Wellfleet, Massachusetts, shqetësohen se shembja do të ndotë ujërat e zonës, duke rrezikuar habitatin detar dhe industrinë e famshme të guaskave në Cape Cod. Një raport i porositur nga autoritetet tregon se, nëse nuk ndërmerren masa, shtëpia do të rrëzohet brenda tre viteve, ndoshta edhe më shpejt.
E ndërtuar në vitin 2010, vila ka qenë në qendër të një beteje të gjatë ligjore. Përpjekjet e ish-pronarëve për të ndërtuar një mur mbrojtës u refuzuan, pasi ekspertët argumentuan se do të përshpejtonte shkatërrimin e vijës bregdetare.
Discussion about this post