Deputeti i Partisë Demokratike Enkelejd Alibeaj, ka komentuar situatën e krijuar në këtë forcë politike, ndërsa ka theksuar se objektivi kryesor i opozitës është përballja me kryeministrin Rama. Lidhur me afatin e ish-kryedemokratit Sali Berisha ndaj Bashës për të liruar zyrën më datë 5 janar, si dhe protestën e thirrur më 8 janar, Alibeaj është shprehur se janë klithma të zbehta të një agonie politike.
“Objektivi kryesor i PD është luftë pa asnjë lloj dyzimi në misionin politik që është përballja me regjimin. Ju keni interes për atë se çfarë është thënë me datë 5 apo me datë 8, besoj se janë vetëm klithma të zbehta të një agonie politike të një qasje politike, e cila s’paku në mënyrë institucionale me datë 18 dhjetor në Kuvendin e 18 dhjetorit kanë marrë fund”, u shpreh ai.
Sipas tij lëvizjes së Berishës dhe krijimit të Komisionit të Rithemelimit nga ana e tij, i mungon diçka thelbësore, siç është moraliteti politik. Ai u shpreh se demokratët e kanë shfaqur vullnetin dhe besimin e tyre ndaj Bashës duke i dhënë 650 mijë vota në zgjedhjet e 25 prillit, ndonëse sipas tij ata ndodheshin nën kushte terrori.
“E gjithë jo lëvizje e Berishës i mungon një element thelbësor, moraliteti politik. Ky vend nuk bën zgjedhje të rregullta, të lira, të ndershme. Këtu do duhet të shohim se çfarë situate kemi përballë. Unë besoj se demokratët patën aftësinë e tyre dhe për të qortuar për aq sasa e menduan në zgjedhjet e 25 prillit, siç edhe i dhanë besimin Lulzim Bashës për atë rezultat për atë betejë dhe pikërisht për atë lloj përthithje të madhe simpatie që bëri në 650 mijë shqiptarë që votuan në kushte terrori electoral”, u shpreh Alibeaj.
Alibeaj deklaroi se kjo strategji e Berishës është keqpërdorim emocional i demokratëve për interesat e tij personal, që nuk kanë lidhje me selinë blu.
“Dëmi më i madh që lëvizja e Berishës ka bërë në këto tre muaj, ka qenë një luftë personale, me një hall personal, në thyerje të premtimit që bëri. Edhe kërkesa e lëshuar për të ardhur me datë 5 apo me datë 8 për të kapur selinë është një lloj mbivendosje duke keqpërdorur gjendjen emocionale të rëndë të demokratëve, për atë se çfarë ndodhi më 25 Prill”, deklaroi ai.
Ish-kryedemokrati Sali Berisha i ka lënë afat kreut actual të Partisë Demokratike, Lulzim Bashës që të lirojë zyrën e kryetarit në selinë blu, deri në datën 5 janar, pasi sipas tij ai është i shkarkuar nga Kuvendi Kombëtar i PD-së në 11 dhjetor, në mënyrë legjitime. Në të njëjtën kohë Berisha ka thirrur mbështetësit e tij në protest në 8 janar.
Discussion about this post