Efektivët të cilët aktualisht janë të transferuar në institucione të administratës shtetërore, sipas Vendimit të Këshillit të Ministrave do të mund të rikthehen për të shërbyer në radhët e Policisë së Shtetit. Kjo procedurë do të mund të realizohet përmes një kërkese me shkrim nga efektivët të cilët duan të rikthehen në radhët e uniformave blu. Kërkesa me shkrim do të depozitohet në Drejtorinë e Përgjithshme të Policisë së Shtetit.
Sipas vendimit të marrë nga Këshilli i Ministrave pas kryerjes së funksionit dhe mbarimit të afatit të caktuar në administratë, oficerët e policisë emërtohen në detyrë sipas gradës policore që kanë dhe i shërbejnë Policisë së Shtetit.
Drejtori i Përgjithshëm i Policisë së Shtetit ka të drejtë që, për nevoja pune, të kërkojë rikthimin e punonjësit në Policinë e Shtetit, para plotësimit të afatit të transferimit, por jo më parë se 6 muaj nga transferimi.
Kur rikthimi në Policinë e Shtetit bëhet pas një periudhe mbi 1 vit kërkohet vërtetimi i besueshmërisë, që është dokument i miratuar nga Kreu Policisë së Shtetit dhe pasqyron rezultatet e verifikimit të të dhënave të vetëdeklaruara në raport me ato të regjistrave fizikë dhe elektronikë të Policisë dhe institucioneve të tjera shtetërore.
Discussion about this post