Banorët e fshatit Zall Dajt në Njësinë Administrative Zall Bastar në Bashkinë e Tiranës janë ngritur në protestë kundër fabrikës së prodhimit të asfaltit, e cila është ndërtuar ngjitur me rrugën e Arbrit.
Banorët e revoltuar thanë se dëmi i shkaktuar nga impianti i prodhimit të asfaltit është i gjithanshëm. Ata shprehen se tymi që del nga impianti është shumë i dëmshëm për shëndetin, pasi nuk ka asnjë filtër që të jetë vendosur aty. Veç ndotjes së ajrit, banorët shprehen se është ndotur lumi, janë prishur rrugë, devijimi i lumit ju ka rrëmbyer tokat bujqësore e shumë probleme të tjera që kanë lidhje me ndërtimin e këtij impianti.
Banorët i kanë kërkuar Bashkisë Tiranë dhe institucioneve të tjera që të ndalojnë këtë masakër mjedisore. Madje banorët shprehen se në një përgjigje të kthyer nga Njësia Administrative Zall Bastar, me vendim të Ministrisë së Turizmit dhe Mjedisit si dhe Agjencisë Kombëtare të Zonave të Mbrojtura duhet që kompania Gjoka Konstruksion të pezullojë menjëherë aktivitetin e prodhimit të asfaltit në këtë territor. Banorët e Zall Dajtit dhe disa fshatrave të tjerë, shprehen se kompania vijon aktivitetin e pashqetësuar, ndërsa paralajmërojnë përshkallëzim të protestave të tyre.
Banorët e Zall Dajtit kërcënojnë se nuk do të marrin pjesë në zgjedhjet e 11 Majit nëse problemi i tyre nuk zgjidhet.
Discussion about this post