Kreu i PD-së, Sali Berisha deklaroi këtë të mërkurë se kryeministrin Edi Rama “e ka kapur frika dhe tmerri i dy dosjeve”. Këtu ai përmendi “laptopin e Engjëll Agaçit”, duke lënë të kuptohet se është në dorën e autoriteteve ligjzbatuese dhe dosjen McGonigal në SHBA.
“Laptopi i Engjëll Agaçit po bëhet si laptopi i Hunter Biden. Po, e ka zhdukur Agaçin. Se Agaçit i kanë kapur laptopin. Dhe laptopi flet dhe do flasë pafundësisht. Dhe Edi Rama nuk ia thotë këtë, mendon se do kalojë çështjen e laptopit duke vënë në arrati Agaçin apo duke e shtruar në spitale. E vërteta është se ajo që shihni ju, ai shfazim, ato sulme të paprecedenta të një pushteti ndaj pushtetit tjetër, janë të lidhura kryekëput me personin e Edi Ramës”, tha Berisha në një fjalim të mbajtur me grupin parlamentar demokrat.
Për dosjen McGonigal, tha se në mediat amerikane, është kthyer si çështje kryesore.
“Është dosja më e zezë në çdo aspekt dhe unë u garantoj ju se asaj dosje, të bëjë ç’të dojë, të shesë Surrelin dhe çdo pasuri që ka, asaj dosje nuk i shpëton dot. E ka kuptuar këtë sepse e mbrojti gjer tani Spaku i tij, tani nuk e mbron më. Tani është një drejtësi tjetër e fuqishme e vendosur të hetojë krime të mëdha si kjo”, u shpreh kryedemokrati.
Berisha tha më tej se PD nuk do bashkojë votat me Edi Ramën për asnjë lloj mase ndaj sistemit të drejtësisë.
Gjatë fjalës së tij, duke përmendur fushatën, Berisha konstatoi se është krijuar një frymë optimizmi, vendosmërie dhe besimi, që sipas tij, nuk është parë që nga viti 1991. Ai u kërkoi deputetëve demokratë angazhim maksimal me regjistrimet e diasporës.
Kreu i PD foli edhe për raportimin që rektori i UBT bëri para kryeministrit Edi Rama dhe grupit parlamentar të PS më herët gjatë ditës.
“Unë nuk marr përsipër të them as për dosjen, por them një gjë, që rektori e përleu keq universitetin se kur mendon të shpëlash apo të qash për një aferë në rifuxhion e hajdutëve, duhet të mendosh 5 herë që të futesh aty. Nuk janë pekatorium ata, ata janë furbiorium. Se janë hajdutë ata. E shihnit ju si qesëndisej Lubia apo Taulant Balla? Hë, nuk jemi vetëm ne, janë edhe pedagogë. Shihni se çfarë ndodh me pedagogët. Të cilët, nuk kam asnjë koment, por di një gjë që nuk ndodhte kurrë që të shkosh dhe të bësh konfesion në strofullën e zezë të hajdutëve në Europë siç është ai grup”, tha Berisha.
Në fund, e mbylli me një paralajmërimin ndaj kundërshtarit të tij politik, që “mos të rrethojë institucionet”, ose ndryshe, “Surreli do i rrethohet”.
“Edi Rama, të garantoj se pas datës 11 maj, do të ekstradohesh në SHBA për t’u rigjykuar me McGonigalin. Ky është zotimi ynë. Përndryshe mund të gjykohesh në Shqipëri para 11 majit”, përfundoi Berisha.
Discussion about this post