Deputeti i PD, Tomor Alizoti, ka komentuar burgosjen politike tër Ervin Salianjit gjatë një interviste në emisionin “Kjo javë” në News 24.
Alizoti e ka cilësuar Salianjin si një opozitar të guximshëm, duke theksuar se ai po bën një detyrë të vështirë opozitare. Ai ka shtuar se Salianji do të jetë i lirë dhe do të kthehet në një Shqipëri demokratike, ku PD do të jetë në qeverisje.
Alizoti ka vlerësuar kontributin e Salianjit në terrenin politik dhe ka theksuar se ky moment i vështirë do ta bëjë atë më të fortë dhe me më shumë kapital politik në të ardhmen.
“Salianji është një opozitar i guximshëm. Ai bëri një detyrë opozitare. E përshëndes Salianjin, do jetë i lirë dhe në një Shqipëri demokratike, me PD-në në qeverisje. Salianji është makineri e madhe politike, është punëtor i madh terreni. Ervin Salianji po bën burg politik. Nga ana njerëzore, njerëzit e tij të afërt e ndjejnë keq këtë që po ndodh, por nga ana politike do kthehet në PD me kapital më të madh politik sesa ka qenë. Kjo doza politike, do ta rikthejë më fuqishëm në politikë”, tha Alizoti.
Lidhur me primaret, u shpreh se procesi po ecën me një fluks të madh votuesish dhe mund të zgjasë edhe pas orës 18:00. Ai përmendi se pjesëmarrja në primaret e PD ka qenë e madhe, veçanërisht në Elbasan.
Ai shprehu besimin se Partia Demokratike do të dalë fituese në zgjedhje.
“Kjo qeveri është denigruar përpara njerëzve, nuk ka çfarë të japë më, ndodhin të njëjtat gjëra. Tezat e Ramës kanë mbaruar. Gjysma e qeverisë është në burg ose të arratisur. Nuk ka arsye përse Rama të vazhdojë të jetë kryeministër, pasi politikanët që kanë qenë në nivele të larta janë në burg. Ramës nuk i ngjit më as batuta, nuk drejtohet një vend me gallatë. Rama është bërë një adoleshent, që zihet me ata që komentojnë në facebook”, shtoi.
Sipas tij, statusi “non grata” nga SHBA i kreut të PD, Sali Berisha ka rënë dhe ai tani është i lirë të udhëtojë.
Lidhur me pozicionimin e Chris LaCivita, bashkëpunëtor i Donald Trump, krah PD në këtë fushatë elektorale, Alizoti deklaroi:
“Është nder për ne që LaCivita erdhi në Shqipëri. Nëpërmjet LaCivita kemi një derë të hapur tek Trump. Fakti që e sulmojnë, tregon se ai është njeri tepër i rëndësishëm, është njeriu më i rëndësishëm në fushatën që u fitua në SHBA nga Donald Trump. Mbështetja e tij është shumë ndihmuese për ne”.
Discussion about this post