Në shkurt të vitit 2015, qeveria e kryeministrit Edi Rama miratoi një plan pune të quajtur “Plani i Rimëkëmbjes Financiare të Sektorit të Energjisë Elektrike”. Një dekadë më vonë, premtimi për reduktimin e humbjeve nuk është materializuar, ndërsa gjendja financiare e sektorit është e panjohur për shkak të mungesës së transparencës.
Një dekadë më parë, qeveria shqiptare e kryeministrit Edi Rama nisi një fushatë të gjerë raprezaljesh që sollën arrestimin e dhjetra vetëve, shumë prej të cilëve u hetuan nën masën e sigurisë arrest me burg. Synimi i fushatës së raprezaljeve ishte që të përmirësohej situata financiare e sektorit të energjisë elektrike, pasi vjedhjet dhe humbjet teknike ishin në nivele të larta.
Plani i Rimëkëmbjes Financiare të Sektorit të Energjisë Elektrike, i miratuar nga Këshilli i Ministrave më 25 shkurt 2015, pra një dekadë më parë, parashikonte që luftimi i vjedhjeve do të mund të krijonte të ardhura, të cilat, duke u investuar në rinovimin e infrastrukturës energjetike të vendit, do të sillte reduktimin e humbjeve teknike në nivele të pranueshme.
Në faqen 13, parashikonte që humbjet teknike, të cilat pasqyrojnë humbjet në rrjet kryesisht për shkak të amortizimit dhe moszëvendësimit në kohë të linjave dhe transformatorëve, të uleshin nga 21% që ishin në vitin 2015, në 6 për qind në vitin 2020. Dhe humbjet joteknike, eufemizma e përdorur për të treguar vjedhjet e energjisë, do të duhej të uleshin, nga 11% në vitin 2015, në 2% në vitin 2020. Të dyja kategoritë e humbjeve për rrjedhojë do të duhej të ishin jo më shumë se 8% e energjisë së hedhur në rrjet.
Plani parashikonte gjithashtu krijimin e institucioneve të pavarura mbikëqyrëse si Enti Rregullator i Energjisë, i cili duhej të mbikëqyrte tregun në mbrojtje të konsumatorëve.
Discussion about this post