Nuk kanë të ndalur protestat në Greqi. Mijëra qytetarë u mblodhën para Parlamentit në Athinë mbrëmjen e së premtes për të kërkuar drejtësi në lidhje me aksidentin tragjik hekurudhor në Tempi, ku humbën jetën 57 persona më 28 shkurt 2023.
Protestuesit, duke përfshirë familjarë të viktimave, studentë dhe qytetarë të thjeshtë, kërkuan transparencë dhe përgjegjësi për mangësitë në infrastrukturën hekurudhore që çuan në aksidentin fatal.
Ata mbanin në duar pankarta me mesazhe si “Duam drejtësi” dhe “Jetët tona kanë vlerë”, duke theksuar nevojën për përmirësime në sigurinë e transportit publik.
Gjatë protestës, një grup individësh të maskuar u përplasën me forcat e policisë, duke hedhur koktej molotov dhe gurë në drejtim të tyre. Policia u përgjigj me gaz lotsjellës për të shpërndarë turmën. Përleshjet u përhapën në rrugët përreth sheshit Sintagma, duke çuar në arrestimin e dhjetëra personave dhe plagosjen e disa të tjerëve.
Protesta të ngjashme u zhvilluan edhe në qytete të tjera të Greqisë, duke përfshirë Selanikun, ku u raportuan incidente të ngjashme me përdorimin e koktejeve molotov dhe ngritjen e barrikadave. Transporti publik u ndërpre në shumë zona, ndërsa fluturimet dhe shërbimet hekurudhore u anuluan.
Discussion about this post