Erion Veliaj reagon sërish nga qelia! paralajmërimi i tij: Detaje më shumë do të jap nesër…

Erion Veliaj, kryebashkiaku i Tiranës, është aktualisht në paraburgim që nga 10 shkurti 2025, i akuzuar për korrupsion dhe pastrim parash. Më 11 mars 2025, Gjykata e Posaçme e Apelit do të shqyrtojë ankimin e tij kundër masës së sigurisë “arrest me burg”.

Në një deklaratë nga qelia në rrjetet sociale,Veliaj ka shprehur shqetësimet e tij lidhur me procesin hetimor, duke e krahasuar atë me praktikat e regjimit të kaluar dhe duke theksuar rëndësinë e prezumimit të pafajësisë në një demokraci europiane. Ai gjithashtu ka kritikuar trajtimin e familjes së tij dhe sipërmarrësve, duke e konsideruar atë si një kthim në praktikat e vjetra të persekutimit.

Veliaj ka njoftuar se do të japë më shumë detaje gjatë seancës së ardhshme gjyqësore.

Reagimi:

Përshëndetje miq,

Pas një muaji izolim, nesër do të rikthehem për të mbrojtur veten, familjen, por edhe çdo shqiptar, që beson se:

Letrat anonime janë pjesa më e shëmtuar e regjimit që lamë pas e s’kanë vend në Shqipërinë moderne.

Shpallja “i dënuar” pa gjyq që në nisje, ndodhte në ditët më të errëta të ferrit komunist, por jo në një demokraci europiane.

Hetimi i biografisë personale apo vetting-u i paligjshëm, si ky imi për 20 vjet, ndodhte vetëm në kohën e Sali Enverit, por jo sot në shek. XXI.

Kërkesa për pendesë ende pa akuzë, ngjan me gjyqet popullore histerike në vitet ‘60, por jo në 2025.

Persekutimi i familjes nga një noter nga babi, me 5-a, pa meritë e pa ligj, ndërtues në konflikt interesi, nuk mund të jetë etaloni i Reformës në Drejtësi.

Lënia e kryeqytetit pa drejtim nga i votuari i njerëzve me një të rënë të lapsit është, në mos grusht shteti, grusht ndaj qytetit, punëve të tij dhe votuesve të Tiranës.

Shteti me “Uacap” në ditë pushimi, nga militantë të zellshëm të Saliut, sot hetues të Olsit, është fyerje ndaj reformës ku besuam të gjithë.

Trajtimi i sipërmarresve si “kulakë” dhe përgjimi i njerëzve të biznesit pa fakte, i përket Shqipërisë së pas luftës, jo të demokracisë.

Presioni ndaj dëshmitarëve, duke iu kujtuar burgun, prindërit e fëmijët, u përket xhelatëve të një regjimi, jo demokracisë.

Prezumimi i pafajësisë është detyrim për standard Europian, dhe jo histeri kolektive e banaqeve, portaleve dhe kundërshtarëve që me votë i mundëm 7 herë në Tiranë, e veç me dhunë mund të na heqin nga fushata.

Më shumë do të them nesër në seancë!

Shpresoj të jeni mirë! Kush po agjëron, e pastë sa më të lehtë, e kush më ka menduar e më ka mbajtur në lutje, Zoti ju bekoftë!