Sali Berisha zgjodhi t’i urojë shqiptarët Ditës së Verës nga Elbasani ku u shfaq së bashku me kandidatët për deputet të Partisë Demokratike.
“Ju uroj nga zemra këtë festë, më të lashtën dhe më të bukur, festën e ndërrimit të natyrës, festën e shpresës. Dita e verës e gjen Elbasanin, i gjen shqiptarët më optimist dhe më besimplotë se kurrë në ndryshimin e madh të 11 majit”, tha Berisha.
Edhe pse një festë, mesazhet politike nga lideri i opozitës nuk munguan. Berisha u ndal të shpaloste disa nga pikat e programit të PD, që sipas tij do të shërbejnë për të rimëkëmbur ekonominë e familjeve shqiptare.
“Kjo ditë frymëzon çdo shqiptar që më 11 maj të ndahet nga ky regjim që i varfëroi ata deri në palcë. Unë sot nga Elbasani u premtoj shqiptarëve se tre muajt e parë, ajo që e kemi quajtur paketë e dhembshurisë do të nxjerrë çdo shqiptar nga varfëria ekstreme. Do të kenë një minimum jetik prej 200 euro. Nuk do ketë pensionist që do marrë nën 200 euro, pavarësisht sa e ka sot pensionin, pavarësisht nëse ka apo jo pension, pavarësisht nëse e ka të plotë apo të pjesshëm. Do ketë një rritje 20% të pensioneve, do ketë rrogë minimale jo më pak se 500 euro, do këtë rrogë mesatare 1200 euro. Nuk do ndalim vrapin derisa të bëhemi njerëzit më të paguar në rajon”, tha Berisha.
Kryedmeokrati nuk e kurseu një mesazh për deputetin opozitar të qarkut, Dashnor Sula, i cili mbeti jashtë listave të PD për zgjedhjet e 11 majit.
Sula në limitet e kohës për regjistrimin në KQZ iu bashkua koalicionit “Nisma – Shqipëria Bëhet”, si pjesë e listës së hapur të kandidatëve në Elbasan. Më herët, këtë lëvizje të deputetit, Berisha e ka cilësuar të gabuar.
“Dashnor Sula bëri zgjedhjen e tij, midis betejës në sheshin e burrave zgjodhi Tikun dhe iku në punën e tij, ka kohë ta mendojë”, tha sot kryedemokrati nga Elbasani.
Lideri demokrat bëri thirrje gjithashtu se “asnjë votë nuk duhet të shkojë për patericat e Edi Ramës”.
“Do t’u them qytetarëve, asnjë votë për patericat e Edi Ramës, sepse ata u ftuan botërisht, pavarësisht nga mendimet e ndryshme, nëse e ndjeni veten opozitarë, bashkohuni me ne në aleancë. Mirëpo ata nuk i lejuan problemet e tyre ndaj dhe votat për ta janë vota për Edi Ramën, de facto”, deklaroi ai.
Discussion about this post