Edhe pse pretendimi se PS është e vetmja forcë politikë që mund të integrojë vendin në BE u rrëzua nga Bashkimi Euriopian, Rama vijon ta përdorë si retorikë politike para zgjedhjeve parlamentare.
Sipas tij, vota masive për Partinë Socialiste në zgjedhjet e ardhshme, do të çojë në mundësinë e marrjes së pasaportës europiane për çdo shqiptar deri në vitin 2030.
Ai ka pretenduar se ky hap do të ndihmojë në mbylljen e një historie të turpshme dhe do të mundësojë që shqiptarët të kenë më shumë mundësi për të punuar dhe studiuar në vendet e Bashkimit Europian.
Rama ka shtuar se për të arritur këtë qëllim, PS ka nevojë për një mandat më të fortë se ato të mëparshmet, duke nënvizuar se një votë e bashkuar mund të çojë në realizimin e këtij plani, duke eliminuar diskriminimin ndaj shqiptarëve dhe përmirësuar mundësitë për lëvizjen e lirë në Europë.
“Ne mund të mbyllim historinë poshtëruese. Mos të na shohin më si dele të zeza. Mos t’i japim llogari një polici në aeroport se pse po hyj në një vend të BE dhe kur do iki. Ne do i sigurojmë çdo shqiptari pasaportën europiane të Shqipërisë. Në pasaportë do të shtohet edhe Bashkimi Europian. Na duhet një mandat më i fortë se 3 mandatet e mëparshme. Me votën e bashkuar, mund të kemi mundësinë që të pajisim çdo shqiptar me pasaportën europiane. Do të jetë më e lehtë për shqiptarët të punojnë dhe të studiojnë në vende të BE-së. Shqipëria do të ketë njerëzit e saj në administratën e Brukselit”, tha Rama në podkastin e tij “Flasim”, transmetuar në rrjetet e tij sociale këtë të shtunë.
Discussion about this post