Kristjan Asllani mbetet ende në dyshim për vazhdimësinë te Interi. Mesfushori shqiptar e ka zhvendosur vëmendjen në merkato, me klubin italian që po mendon ta largojë për sezonin e ardhshëm.
Interi synon Santiago Castron. Pëlqimi për zikaltërit dhe sulmuesit argjentinas tashmë është i njohur, për ta identifikuar edhe si përforcim perfekt për repartin ofensiv. Pengesë është vlerësimi i Bolonjës për futbollistin, 40 milionë euro.
Një shifër penguese për milanezët, të cilët sipas asaj që shkruan “La Gazzetta dello Sport”, në përpjekje për të ulur kërkesat e kuqebluve mund të përfshijë në marrëveshje Asllanin.
Shqiptari vlerësohet shumë nga dyshja Italiano-Sartori dhe mund të përfshihet në operacion.
Bolonja dhe Interi do të duhet të diskutojnë gjithashtu situatën në lidhje me Giovanni Fabbian.
Zikaltërit kanë një klauzolë kthimi prej 12 milionë Euro dhe gjithashtu mund të përfshihet në marrëveshjen e Castros në një farë mënyre.
Discussion about this post