Një sasi prej rreth 18 ton fileto pule e kontaminuar me bakterin e salmonelës ka hyrë në Shqipëri përmes portit të Durrësit, ndërsa besohet se ajo ka përfunduar edhe në tryezat e qytetarëve.
Hetimet mbi skandalin e filetos së infektuar kanë zbuluar se një sasi ende e paqartë e kësaj ngarkese ka hyrë në treg edhe pse ishte zbuluar se përmbante bakterin e rrezikshëm.
Ngarkesa e dyshimtë ka mbërritur në Portin e Durrësit më 11 mars 2025 dhe është marrë nga kompania Dimal Inc, një subjekt i themeluar në vitin 2019 nga Mondi Goxha, një nga të akuzuarit kryesorë në këtë çështje.
Kur më datë 11 mars pasi ngarkesa ka mbërritur në Shqipëri, është marrë mostër nga AKU dhe ISUV, dy institucionet përgjegjëse për sigurinë ushqimore. Që nga momenti i kapjes së sasisë së filetos së pulës me salmonelë më 11 mars, AKU nuk ka bërë asnjë njoftim për konsumatorin dhe ka dalë me një deklaratë 1 javë pasi u kryen analizat.
Ngarkesa ka rezultuar me përmbajtje salmonele, ndërsa ISUV vendosi të thellojë analizat por nuk ndaloi shitjen në treg të produktit.
7 ditë pas futjes në Shqipëri, rezultatet e analizave treguan se mishi ishte i infektuar me llojin më të rëndë të bakterit të salmonelës.
Kjo kompani, megjithëse e re në tregun ushqimor shqiptar, ka përfituar disa grante nga programi IPARD, duke investuar në pajisje dhe teknologji.
Discussion about this post