Kryeministri Edi Rama ishte sot në Qendrën Spitalore Universitare “Nënë Tereza” ku mori pjesë në inaugurimin e ambienteve të reja të Pediatrisë.
Gjatë fjalës së tij, Rama është shprehur se në shëndetësi përveç pagës bazë, mjekët dhe infermierët duhet të paguhen dhe në bazë të performancës së tyre. Ndër të tjera kreu i qeverisë ka bërë me dije se gjatë mandatit të tyre të tretë do të rrisin sërish pagat e punonjësve të shëndetësisë duke filluar nga ky vit.
“Është shumë e rëndësishme që ne tu japim mundësi mjekëve dhe infermierëve që të paguhen më shumë jo vetëm duke rritur pagën bazë, por ti japim sistemit dhe mundësinë për diferencime. Me këtë duhet që të kuptojmë se më lart ngjiten ato që i japin më shumë sistemit dhe paga bazë është e njëjtë për të gjithë. Një ngjitje marrin të gjithë ato që përmes punës dhe performancës sjell të ardhura më të larta në raport me një tjetër koleg që paguhet me pagën bazë por për shkak të performancës mesatare nuk merr dot sa një koleg. Këtë vit do të bëjmë një rritje tjetër të pagave dhe parashikojmë që brenda mandatit të shkojë në 40+”, ka thënë Rama.
Sipas kryeministrit një tjetër sfidë e mandatit të tretë në shëndetësi është gjithashtu edhe përfundimi i rikonstruktimit të ambienteve të QSUT-së, duke e kthyer në një nga komplekset më të mëdhenj spitalor në rajon.
Discussion about this post