Edi Rama na kërkon edhe një mandat. Me çfarë fytyre, s’e kuptojmë. Me fytyrën e njeriut që pas 11 vitesh në pushtet, ka arritur të bëjë atë që nuk e bëri as kriza e viteve ’90: të boshatisë Shqipërinë. Sot, vendi është kthyer në një terminal tranziti — ku njerëzit nuk mendojnë më ‘çfarë do bëj këtu’, por vetëm ‘kur do iki’.
Thotë na jepni një mandat tjetër, që t’ju fus në Bashkimin Europian. E ku ka më ironi se kaq! Si mund të fusësh Shqipërinë në BE, kur po nuk mbetet më Shqipëri për të futur? Çfarë do fusësh në BE, kullat e Tiranës pa banorë? Peshqeshet që ke ndarë me koncesione 99-vjeçare? Apo ndonjë grafik me emoji në Instagram që thotë se ‘jemi më mirë se kurrë’? A e kupton zoti kryeministër që nuk bëhet shteti europian me show, por me sistem? Dhe ti ke bërë çdo gjë, përveç sistemit.
Shqiptarët janë lodhur duke dëgjuar se ‘negociatat do hapen’. Po negociatat me njerëzit që po ikin nga vendi, i ke hapur ndonjëherë? Këta njerëz nuk po kërkojnë liberalizim vizash — ata po kërkojnë liberalizim nga ju. Nga paaftësia, arroganca, gënjeshtra, propaganda, nga sundimi pa alternativë që i trajton si publik spektatori, jo si qytetarë me halle reale.
Rama thotë ‘më jepni një mandat të tretë për ta çuar Shqipërinë në Europë’. Po si? Me avionët charter që i nisen shqiptarët drejt azilit? Apo me marrëveshjet për të strehuar emigrantët e tjetrit, ndërkohë që tanët rrinë nëpër tenda në Londër? Kjo është Europa që po na premton? Një Europë që ne e shohim me sy të skuqur nga aeroportet, e jo me pasaportë të barabartë?
Rama ka ndërtuar një Shqipëri ku çdo shqiptar ndjehet turist në vendin e vet — gjithçka është për ‘imazh’, asgjë për qytetarin. Dhe me gjithë këtë bilanc, kërkon votë. Një votë tjetër, thotë ai, që të mbyllë ciklin. Po cikli është mbyllur, Edi. Sepse ky është cikli i një politike që e sheh pushtetin si pronë dhe popullin si dekor. E kemi parë filmin, e kemi parë fundin, dhe nuk ka sequel që na mashtron më.
Ajo që nuk kupton Rama është se shqiptarët nuk duan thjesht të hyjnë në Europë si fjalë në fjalim, por të ndjehen europianë në jetën e përditshme. Me spitale që funksionojnë, me shkolla ku nuk duhen zarfa, me gjykata që nuk janë filial i partisë. Dhe mbi të gjitha: me dinjitet që nuk varet nga lotaria e vizave.
Prandaj jo, nuk të japim më mandat për të na futur në BE. Sepse shqiptarët e kanë kuptuar se Europa nuk vjen me një buzëqeshje live, por me liderë që ndërtojnë shtet. Dhe ti kishe 11 vjet për ta ndërtuar — por zgjodhe ta lyhesh me propagandë.
gijotina.com/
Discussion about this post