Dy të rinj shqiptarë janë dënuar me nga nëntë vite burg secili nga një gjykatë në Angli, pasi u shpallën fajtorë për përdhunimin e një gruaje britanike në qytetin Leicester. Ngjarja ndodhi në tetor të vitit 2023, kur vajza raportoi në polici se ishte sulmuar seksualisht.
Sipas hetimeve, ajo kishte qenë në një klub nate së bashku me miqtë e saj, ku gjatë mbrëmjes kishte takuar një djalë. Më vonë, ajo ishte ndarë nga grupi dhe kishte dalë jashtë me 22-vjeçarin Redjon Cenaj. Aty u bashkua edhe 20-vjeçari Mariglen Ferataj.
Të tre hipën në një taksi që i çoi në banesën e viktimës, ku ndodhi dhe akti i dhunës seksuale. Vërtetimet mjekësore dhe pamjet e sigurisë qenë kyçe në zbardhjen e rastit dhe vërtetimin e ngjarjes. Pamjet e kamerave treguan qartë që gruaja nuk ishte në gjendje të mirë, dhe të dy të rinjtë shihen duke e mbajtur dhe ndihmuar atë të hipte në taksi. Në një moment, ajo rrëzohet në tokë dhe Ferataj shihet duke e ngritur dhe futur në automjet.
Shoferi i taksisë dha një dëshmi që konfirmoi se viktima nuk dukej e ndërgjegjshme për situatën në të cilën ndodhej. Një test toksikologjik zbuloi se ajo kishte substanca narkotike në organizëm. Të dy të rinjtë u arrestuan disa ditë më vonë. Gjatë marrjes në pyetje, Ferataj pretendoi se akti ishte me pëlqimin e saj, ndërsa Cenaj mohoi të kishte pasur marrëdhënie seksuale me të.
Megjithatë, në përfundim të procesit gjyqësor në Gjykatën e Leicester muajin e kaluar, të dy u shpallën fajtorë për veprën penale të përdhunimit dhe u dënuan me nga 9 vite burg secili.
Discussion about this post