Policia e Dibrës ka arrestuar ish-drejtoreshën e spitalit të këtij qyteti, Irini Shehu, e cila u shkakrua disa javë më parë, për shkak se dhunoi shefin e Financës së spitalit , 37-vjeçarin Shaban Uklala, duke e goditur me send të fortë.
Në lidhje me atë ngjarje, Irini Shehu u procedua penalisht në gjendje të lirë për kryerjen e veprës penale “Plagosja e lehtë me dashje”.
Por, gjatë kohës që ka qenë nën hetim, ajo ka vazhduar sherret me ish-vartësit e saj, duke i kërcënuar në telefon me sms.
Rasti më i fundit është ai me kryeinfermieren e spitalit të Dibrës, 48-vjeçaren Shpresa Biçi, e cila ditën e djeshme ka bërë kallëzim në Polici, ku denonconte se ishte kanosur nga Irini Shehu.
Pas denoncimit, Irini Shehu është shoqëruar në Polici për t’u marrë në pyetje dhe nisur nga denoncimet e shumta, Prokuroria ka urdhëruar arrestimin e saj, por kjo e fundit mundohet ta shmangë me gjendjen e saj shëndetësore, duke qëndruar në një nga dhomat e spitalit nën monitorimin e Policisë së Shtetit, siç shihet edhe në foton e mëposhtme.
Irini Shehu pretendon se urdhër-arresti ndaj saj është i paligjshëm dhe i pabazuar në prova.
Kujtojmë se më 11 shkurt, Irini Shehu ushtroi dhunë ndaj shefit të Financës së spitalit të Dibrës, 37-vjeçarin Shaban Uklala, duke e goditur me send të fortë.
Fillimisht ata kishin debatuar me njëri-tjetrin gjatë një mbledhje stafi dhe më pas debati ishte zhvendosur në zyrën e shefit të Financës, ku i kishte shkuar e nervozuar drejtoresha e spitalit. Gjatë përplasjes verbale, Irini Shehu ka marrë një shishe dhe e ka goditur në fytyrë Shaban Uklalën duke i shkaktuar demtime.
37-vjeçari pësoi të çara në fytyrë dhe është qepur, teksa në orën 12:00 të mesditës, sipas vetë autoriteteve, ai ka shkoi dhe bëri denoncimin në Polici. Por, kjo e fundit reagoi në orën 22:30, vetëm pas publikimit të lajmit në media, ku u raportua se 37-vjeçarit nuk i ishte pranuar denoncimi për shkak të mbështetjes që ka Irini Shehu në atë kohë nga politika.
Discussion about this post