Bayern Munich është zyrtarisht kampion i Bundesligës për sezonin 2024-2025. Një gol i Poulsen (Leipzig) dje në minutën e 95-të shtyu festën e Bayern, por lajmi i mirë për bavarezët ka ardhur ditën e sotme.
Freiburg-Leverkusen ka përfunduar në barazim 2-2, duke bërë kështu që Bayern Munich të fitojë titullin kampion edhe zyrtarisht. Vendasit shënuan fillimisht në fund të pjesës së parë me Eggestein, ndërsa në fillim të 45 minutave të dyta, Hincapie shënon autogol në portën e tij, duke i dhënë kështu avantazhin e dyfishtë Freiburg.
Reagimi i “Aspirinave” do të vinte në minutën e 82-të, ku Florian Wirtz do të ngushtonte shifrat me golin e tij, i cili në fakt ishte një supergol. Një realizim perfekt i 21-vjeçarit. Goli i barazimit do të vinte në minutën e 93-të nga Jonathan Tah. Rezultati përfundimtar 2-2.
Duke qenë se kanë mbetur edhe dy javë nga fundi i sezonit, distanca mes Bayern Munich dhe Leverkusen është 8 pikë. Ndërsa Freiburg me barazimin e marrë sot i “rrëmben” Dortmundin vendin e katërt, me 52 pikë, 1 pikë më shumë se verdhezinjtë.
Discussion about this post