Presidenti i SHBA-së, Donald Trump ka përsëritur kërcënimin e tij për të aneksuar Groenlandën me forcë ushtarake nëse do të ishte e nevojshme, duke thënë se SHBA-ja kishte nevojë për ishullin e madh Arktik “urgjentisht” për sigurinë kombëtare.
Duke iu përgjigjur një pyetjeje nëse e përjashton apo jo përdorimin e forcës ushtarake, Trump tha: “Nuk e përjashtoj. Nuk them se do ta bëj, por nuk përjashtoj asgjë.”
“Groenlanda ka një popullsi të vogël, për të cilën do të kujdesemi dhe do ta vlerësojmë. Por ne kemi nevojë për këtë për sigurinë ndërkombëtare”, tha presidenti amerikan.
Për muaj të tërë, Trump ka hedhur idenë që SHBA-ja të marri kontrollin e Groenlandës, e cila është një pjesë autonome e Mbretërisë së Danimarkës, dhe më parë ka sugjeruar përdorimin e forcës ushtarake si një opsion.
Gjatë mandatit të tij të parë në detyrë, Trump shkaktoi reagime nga Evropa pasi propozoi blerjen e Groenlandës, ishullit më të madh në botë.
Gjeografikisht, Groenlanda është pjesë e kontinentit të Amerikës së Veriut dhe shtrihet në Arktik. Ishulli ka një rëndësi të madhe për klimën globale dhe për kontrollin ushtarak të Arktikut.
Groenlanda është gjithashtu e pasur me burime të tilla si metalet e rralla. Përveç kësaj, rrugë të rëndësishme detare kalojnë nëpër rajon. Qeveritë e Groenlandës dhe Danimarkës i kanë hedhur poshtë me forcë ambiciet e Trump.
Trump ka shprehur gjithashtu interes për ta parë Kanadanë të bëhet pjesë e SHBA-së, dhe deklaratat e tij të përsëritura për këtë çështje – mendohet se kanë ndikuar edhe në rezultatin e zgjedhjeve të fundit në vend.
Gjatë intervistës për NBC, presidenti amerikan e bëri të qartë se nuk e konsideronte forcën ushtarake një opsion për Kanadanë.
Discussion about this post