Zgjedhjet parlamentare të 11 majit sollën surpriza të mëdha në qarkun e Kukësit, ku për herë të parë një 25-vjeçare, Elvira Peka, arriti të sigurojë një mandat deputeti përmes sistemit të listave të hapura, duke lënë jashtë Parlamentit ish-deputetin e PD-së, Isuf Çela.
Kandidatë nga rrethi i Hasit dhe pjesë e listës së Partisë Demokratike – Aleanca për Shqipërinë Madhështore (PD-ASHM), Elvira Peka ka fituar 2050 vota preferenciale, duke e kaluar ndjeshëm Çelën, i cili u ndal në vetëm 667 vota, si dhe kandidatin tjetër të PD-së, Shkëlqim Shehu, që mori 378 vota.
Kjo është fitorja më e theksuar në një garë të brendshme brenda listës së PD-së në Kukës dhe sinjalizon një ndryshim brezash dhe përfaqësimi në politikën shqiptare.
Kush është Elvira Peka?
Elvira Peka ka përfunduar studimet e larta në Fakultetin Ekonomik, dhe aktualisht punon në një zyrë kontabiliteti. E angazhuar në aktivitetet komunitare dhe politike në zonën e Hasit, ajo ka qenë një zë i ri në fushatën e PD-së, që duket se ka gjetur mbështetje të gjerë, veçanërisht tek të rinjtë.
Zgjedhja e saj në Kuvend vjen si pjesë e rilindjes së brendshme të PD-së, që me sistemin e listave të hapura po sjell profile të reja dhe më përfaqësuese për komunitetet lokale.
Discussion about this post