Sekretari i Përgjithshëm i Partisë Demokratike, Flamur Noka, ka deklaruar se zgjedhjet parlamentare të 11 majit nuk do të pranohen nga PD, duke akuzuar Partinë Socialiste për manipulim masiv të procesit zgjedhor.
Në një prononcim për Top Channel, Noka tha se zgjedhjet janë zhvilluar nën presion të fortë politik dhe ekonomik, me përfshirjen e patronazhistëve dhe strukturave të shtetit në funksion të makinerisë elektorale të PS-së.
“Këto zgjedhje nuk mund t’i pranojmë. Që nga 2017-a, Edi Rama dhe regjimi i tij kanë fuqizuar financiarisht dhe politikisht makinerinë e vjedhjes së votës. A ka pasur ndonjëherë votë të lirë në Shqipëri?”, deklaroi Noka.
Ai theksoi se opozita nuk do të dorëzohet, duke nënvizuar se është e vendosur të mbrojë demokracinë, edhe pse kjo nuk mund të arrihet vetëm nga forcat opozitare.
“Vota në kuti nuk është prekur. I jam mirënjohës komisionerëve dhe numëruesve tanë që po e bëjnë punën me ndershmëri,” – shtoi ai.
Noka ngriti gjithashtu akuza serioze për presion ndaj diasporës, duke pretenduar se qytetarëve shqiptarë jashtë vendit u është kërkuar jo vetëm të votojnë, por edhe të dërgojnë fotografi të votës.
“Ku është SPAK në këtë proces? Pse nuk ka reagim ndaj abuzimeve me votën?”, pyeti ai.
Deri më tani janë numëruar rreth 70% e votave në rang vendi, me Partinë Socialiste që projektohet të ketë 82 mandate, ndërsa Partia Demokratike – Aleanca për Shqipërinë Madhështore 52 mandate.
Discussion about this post