Të tjera detaje janë zbardhur në lidhje me operacionin antimafia italian, ku tonelata të tëra me lëndë narkotike dërgoheshin nga Shqipëria në Itali. Sipas grupit hetimor, mafia shqiptare e transportonte heroinën duke e fshehur atë tek persona të moshuar ose tek individë me karroca invalidi. Lënda narkotike e cilësisë së lartë, pasi dërgohej në Itali, peshohej 4-5 herë më shumë dhe më pas nxirrej në treg, duke sjellë përfitime të mëdha financiare.
Paratë e përfituara nga mafia shqiptare dërgoheshin në Shqipëri përmes autobusëve të agjencive të udhëtimit. Tonelatat me heroinë mbërrinin në qytetin e Barit, ku droga transportohej përmes rrugëve detare nga Shqipëria. Ky aktivitet kriminal përfitonte miliona euro, të cilat depozitoheshin në llogaritë e personave që menaxhonin një trafik shumë më fitimprurës se ai i kokainës.
Sipas raportimeve të mediave italiane, të cilat kanë zbardhur dosjet hetimore të policisë italiane, droga që dërgohej nga Shqipëria ishte e një cilësie shumë të lartë dhe më pas përzihej me medikamente mjekësore, si dhe me detergjent për larjen e rrobave. Pas përzierjes së drogës nga mafia italiane, sasitë e heroinës peshoheshin pesë herë më shumë, dhe fitimet ishin shumë më të mëdha se ato nga shitja e kokainës.
Lënda narkotike mbërrinte në Bari me tragete nga Shqipëria, e fshehur tek persona të moshuar që udhëtonin në kabina ose tek ata që udhëtonin me karroca invalidi. Ndërkohë, paratë ktheheshin në Shqipëri të fshehura në autobusët që nisen çdo ditë nga porti i Pulias.
Operacioni “Ura” i DIA-s italiane tregoi se tregu i heroinës është më i lulëzuar se kurrë dhe se qendra e trafikut është lagjja Madonnella, një zonë që tani është bërë një destinacion turistik dhe një qendër për jetën e natës. Aktiviteti kriminal fshihej pas një kompanie termohidraulike, e cila ndodhej pranë një shkolle fillore në zonën e Madonnellës.
Për aktivitetin kriminal në Itali janë arrestuar dhe proceduar 9 persona, ndërsa në Shqipëri janë ekzekutuar 40 urdhër arresti nga 52 që ishin lëshuar për ekzekutim. Gjatë hetimeve, janë zbuluar shifrat e lëvizjes së parave, ku gjatë një kontrolli në një banesë në Itali, agjentët e DIA-s gjetën 42 mijë euro, ndërsa në Durrës u sekuestruan 3 milionë euro në cash. Shkëmbimet e dokumentuara gjatë hetimeve arritën një vlerë prej 4.5 milionë eurosh, ndërsa xhiroja totale për dy vjet u vlerësua në 7 milionë euro.
Zona, ku për më shumë se tre dekada nuk ishte raportuar shitje e heroinës, u bë e njohur për përhapjen e trafikut të saj pas rikthimit të drogës nga Gianni Di Cosimo, i cili kishte ikur në Shqipëri si i arratisur. Më pas, në këtë aktivitet u përfshi edhe personi me nofkën “Enrico”, i identifikuar si Erigels Presi, 37 vjeç, nga Shqipëria.
Discussion about this post