Pas titullit kampion në Ligue 1, PSG ka fituar dhe Kupën e Francës, duke mundur 3-0 Reims në finalen e luajtur në “Stade de France”.
Në minutën e 16-të, Bradley Barcola zhbllokoi rezultatin, duke shënuar një gol të bukur pas asistit po aq të bukur të Desire Doue. Në minutën e 18-të, u përsërit e njëjta skenë, Desire Doue asiston, Bradley Barcola shënon.
Në fund të pjesës së parë ishte radha e Achraf Hakimi për të shënuar, pas një topi të bukur në zonë nga Barcola.
Në pjesën e dytë, PSG shpërdoroi disa raste të pastra për të thelluar rezultatin, Ousmane Dembele goditi shtyllën po ashtu, duke iu afruar shumë golit.
Rezultati përfundimtar, 3-0 për PSG-në.
Skuadra e drejtuar nga Luis Enrique, si sot një javë luan në ndeshjen më të rëndësishme të sezonit, finalja e Champions League, aty ku do përballet me Interin.
Luis Enrique: Jemi gati për Interin, duam të bëjmë historinë
Pas përfundimit të finales së mbrëmshme, trajneri Luis Enrique, duke folur për “BeIN Sports”, deklaroi: “Ishte një ndeshje shumë e mirë. Jemi përgatitur më së miri për finalen e 31 majit. Kjo finale (e Ligës së Kampionëve) është e rëndësishme. Duam të bëjmë histori. Jemi gati.
Jemi një skuadër e vërtetë dhe duam të fitojmë trofe. Nuk është normale të luash një pjesë të parë në këtë nivel, sepse Reims ka luajtur në ‘play-off’, por ne jemi gati. Finalja e Ligës së Kampionëve do të jetë një moment i veçantë për të gjithë. Nuk ka ndonjë përgatitje të veçantë.
Duhet të përballojmë shumë presion, por të përgatitemi sa më mirë. Nuk është e lehtë të menaxhosh gjithçka që ka të bëjë me finale të tilla. Jemi një skuadër e re, por me përvojë, me dëshirën për të ditur se çfarë duam të bëjmë në fushë. Shpresojmë të festojmë edhe pas finales së Ligës së Kampionëve”.
Discussion about this post