BE është gati të përshpejtojë masat kundër tarifave doganore amerikane që brenda dy javësh. Por lufta e tarifave rrezikon të kthehet edhe në një përplasje për gazin. Kthesa e Donald Trump në qëndrimet për tarifat mbi importet nga Europa ka shkaktuar, nga njëra anë, konfuzion të ri në Bruksel dhe, nga ana tjetër, ka konfirmuar edhe një herë mungesën e besueshmërisë së presidentit amerikan. Por pyetja themelore është e thjeshtë: pse e bëri?
Shtëpia e Bardhë jep një version, BE-ja një tjetër. Në Bruksel janë të bindur se pas lëvizjes së manjatit qëndrojnë dy arsye: një “fisnike” – negociatat për Ukrainën dhe rritjen e shpenzimeve ushtarake – dhe një tjetër shumë më prozaike: gazi.
Në dokumentet negociatore
Në Komisionin Europian dhe në disa kryeqytete europiane, ekziston bindja se Trump priste një referencë të qartë dhe sasiore në dokumentet negociatore për rritjen e blerjes së gazit të lëngshëm (GLN) nga Europa. Por megjithëse BE-ja është dakord për të rritur importin e GLN-së, nuk mund ta përmendte zyrtarisht këtë në dokumente. Aq më tepër që linja e Komisionit është e prerë: kurrë më një furnizues i vetëm – duhet të diversifikohet.
Dhe për këtë askush nga 27 vendet anëtare nuk është i gatshëm të tërhiqet, sidomos pas asaj që ndodhi me gazin rus. Përkundrazi, ndër masat kundërshtare që po shqyrton Brukseli është pikërisht “diversifikimi edhe më i thelluar”. Kjo është arsyeja pse nga Uashingtoni flitet për një “frustrim në rritje” ndaj BE-së.
Mungesa e konkretësisë
Për këtë arsye, dy ditë më parë u shpall edhe një tjetër diktat: tarifa 50 për qind. Madje negociatorët amerikanë ankohen për mungesë konkretësie nga pala europiane.
Për manjatin, propozimet e fundit të Brukselit nuk i përgjigjen nevojave të SHBA-së: heqja e përbashkët e tarifave për mallrat industriale, rritja e aksesit për disa produkte bujqësore amerikane, zhvillimi i përbashkët i qendrave të të dhënave të bazuara në inteligjencën artificiale, marrëveshje për blerje strategjike të gjysmëpërçuesve për të përballuar Kinën, bashkëpunim në industrinë detare dhe në sektorin energjetik në tërësi – këto, sipas SHBA-së, nuk mjaftojnë.
Heqje reciproke tarifash
Për Bashkimin Europian, ndërkohë, objektivat e administratës amerikane janë të tjera dhe shumë më pragmatike. Por pikërisht për këtë arsye, edhe pse Komisioni mbetet i angazhuar për të mos ndërprerë dialogun dhe për të synuar një heqje reciproke të tarifave, ai nuk ka ndërmend të pranojë asnjë formë shantazhi – edhe pse ka partnerë si Italia që bëjnë thirrje për kujdes. Nëse më 1 qershor tarifat amerikane hyjnë vërtet në fuqi, atëherë edhe “Kontinenti i Vjetër” do të jetë i detyruar të zbatojë pjesërisht tarifat e veta, më herët se parashikohej.
Dhe në atë pikë, nuk do të ketë asnjë garanci as për blerjet e reja të gazit të lëngshëm nga SHBA. Vetëm pak javë më vonë, në fillim të korrikut, do të nisë zbatimi i paketës së përgjithshme prej 100 miliardë eurosh, e cila mund të rritet deri në 150 miliardë.
E barabartë dhe e kundërt
Sepse përgjigjja e BE-së do të jetë “e barabartë dhe e kundërt”. Një element i fundit ka të bëjë me “Big Tech”. Në atë pikë, të gjitha masat për të reduktuar suficitin tregtar amerikan në sektorin e shërbimeve do të vendosen në tryezë. Duke përfshirë edhe një taksë të rëndësishme për gjigantët e internetit (web tax). Në të njëjtën kohë, javën e ardhshme Brukseli pritet të prezantojë edhe një fond të vetin për inteligjencën artificiale.
Në atë moment, beteja nuk do të jetë më teorike, por praktike. Po gjatë javës së ardhshme, Komisioni do të përpiqet të realizojë një kontakt të ri me Shtëpinë e Bardhë. Dhe vetë Ursula von der Leyen po shqyrton mundësinë për të marrë në dorë vetë dosjen dhe për të diskutuar drejtpërdrejt me Trump.
Discussion about this post