Në Gjykatën e Posaçme të Apelit (GJKKO) vijon procesi i rigjykimit për Festim Bexhdilin, i njohur si kopshtari i kompleksit “Golden”, i akuzuar për përfshirje në rrëmbimin dhe vrasjen e Jan Prengës në janar 2020.
Seanca e fundit u shënua nga kërkesa e avokatit të Bexhdilit, Ilir Murati, i cili kërkoi që trupi gjykues të rishohë pamjet filmike të kamerave të sigurisë që ndodhen në dosje.
“Kemi konstatuar një gabim të rëndë të organit procedues në interpretimin e pamjeve. Prokuroria pretendon se Bexhdili është larguar bashkë me personat e tjerë të përfshirë në ngjarje, por pamjet e kamerave vërtetojnë të kundërtën,” – deklaroi avokati Murati.
Po ashtu, në sallën e gjyqit u shoqërua si dëshmitar shtetasi Aldo Majnishta, i cili pritet të japë dëshmi lidhur me rolin e të pandehurit në ditën e ngjarjes.
Kujtojmë se Gjykata e Lartë rrëzoi më herët vendimin për burgim të përjetshëm ndaj Festim Bexhdilit dhe urdhëroi rigjykim të çështjes, duke e kthyer dosjen në Apel për shqyrtim të ri mbi bazën e provave të kontestuara.
Viktima, Jan Prenga, u rrëmbye në Kamëz dhe më pas u zhduk pa lënë gjurmë, ndërsa dyshohet se u mbajt dhe u ekzekutua në kompleksin “Golden” në Shijak.
Discussion about this post