Gjykata e Posaçme kundër Korrupsionit dhe Krimit të Organizuar ka vendosur të lërë në fuqi masën e sigurisë “arrest në burg” për administartorin e inceneratorit të Fierit, Loran Dushen, i cili u ekstradua dy ditë më parë nga Zimbabve në Shqipëri.
Dusha ishte në kërkim ndërkombëtar prej vitit 2022, pasi ndaj tij rëndojnë akuzat për “korrupsion aktiv të funksionarëve të lartë shtetërorë ose të zgjedhurve vendorë” dhe “pastrim të produkteve të veprës penale ose të veprimtarisë kriminale”, të kryera në bashkëpunim.
Sipas hetimeve të SPAK, Loran Dusha, në cilësinë e administratorit të “Integrated Technology Waste Treatment Fier”, ka përfituar në mënyrë të paligjshme fonde publike, duke përdorur fatura dhe pagesa fiktive për punë dhe shërbime që nuk janë kryer realisht.
Në seancën e sotme, ai nuk ishte i pranishëm për shkak të gjendjes së tij shëndetësore, pasi është shtruar në spitalin e burgut.
Pjesë e kësaj dosjeje janë edhe ish-ministri i Mjedisit, Lefter Koka dhe ish-deputeti Alqi Bllako.
Hetimet për inceneratorin e Fierit u mbyllën dhjetor 2022. Sipas akuzave të SPAK për inceneratorin e Fierit u paguan 4 milionë euro për punë që nuk u kryen asnjëherë, ndërsa 60 milionë lekë është dëmi i shkaktuar në buxhetin e shtetit në skemën e mashtrimit.
Discussion about this post