Një ngjarje e rëndë ka ndodhur pas mesnate në qytetin e Shkodrës, ku një 26-vjeçar ka mbetur i plagosur me armë zjarri pas një konflikti për motive të dobëta.
Ngjarja ka ndodhur rreth orës 00:05, në lagjen “Perlat Rexhepi”, ku dyshohet se shtetasi P. F., 49 vjeç, ka qëlluar me armë ndaj J. Ç., 26 vjeç. I riu është dërguar menjëherë në spital dhe, sipas burimeve zyrtare, ndodhet jashtë rrezikut për jetën.
Policia ka identifikuar autorin e dyshuar dhe e ka shpallur në kërkim, ndërsa kontrollet për lokalizimin dhe arrestimin e tij po vijojnë në disa zona të Shkodrës dhe përreth.
Paulin Fusha, biznesmen në Shkodër, është shpallur në kërkim nga policia për plagosjen e ndodhur mbrëmjen e kaluar në qytetin e Shkodrës.
49-vjeçari dyshohet se ka qëlluar pas një konflikti të çastit ndaj të riut Jozef Çeka. Ky i fundit ndodhet jashtë rrezikut për jetën, me një plagë të lehtë.
Pas ngjarjes, autori është larguar nga vendi i ngjarjes dhe forcat e Policisë vijojnë punën për lokalizimin dhe arrestimin e tij.
Paulin Fusha rezulton me precedentë penalë edhe në të kaluarën, pasi është arrestuar në vitin 2013 gjatë një operacioni antidrogë.
Njoftimi i policisë:
Rreth orës 00:05, në lagjen “Perlat Rexhepi”, shtetasi P. F., 49 vjeç, dyshohet se, për motive të dobëta, ka plagosur me armë zjarri shtetasin J. Ç., 26 vjeç, i cili ndodhet jashtë rrezikut për jetën.
Shërbimet e Policisë vijojnë kontrollet për kapjen e autorit të dyshuar. Grupi hetimor, nën drejtimin e Prokurorisë, po vijon punën për dokumentimin e plotë ligjor të rastit.
Discussion about this post