Shpërthim me tritol në Vlorë, lënda plasëse i vendoset një biznesi (Emri)

Një shpërthim me tritol është regjistruar mbrëmjen e të martës në qytetin e Vlorës.

Mësohet se tritoli i është vendosur godinën së biznesit në pronësi të Vasillaq Bezhani, në rrugën Transballkanike, që funksionon si dyqan për shitje dhe servis motorësh.

Ngjarja ka ndodhur rreth rreth orës 23:00, në lagjen “Bashkimi”. Si pasojë e shpërthimit ka patur vetëm dëme materiale. Në momentin që ka ndodhur shpërthimi, biznesi ka qenë i mbyllur. Tritoli ishte vendosur në dritaren e biznesit, ku përballë saj është edhe një banesë.

Ende nuk dihet se cilat mund të kenë qenë motive e kësaj ngjarje. Zona është e mbuluar me kamera sigurie dhe Policia do të marrë pamjet filmike, të cilat mund ta ndihmojnë grupin hetimor në identifikimin e autorit dhe zbardhjen e ngjarjes.

Ndërkohë pronari i servisit të motorëve ka deklaruar se “nuk kam konflikte me njeri”.

Njoftimi i policisë:

Vlorë/Informacion paraprak

Rreth orës 23:00, në lagjen “Bashkimi”, në dritaren e një servisi motorësh, në pronësi të shtetasit V. B., ka shpërthyer një sasi lënde e dyshuar plasëse, ku si pasojë janë shkaktuar vetëm dëme të vogla materiale.

Në vendngjarje ndodhet grupi hetimor, i cili vijon punën për zbardhjen e rrethanave të ngjarjes dhe identifikimin e autorit/ëve të dyshuar.