Në Gjykatën e Posaçme Kundër Korrupsionit dhe Krimit të Organizuar (GJKKO) nis sot seanca e parë gjyqësore në themel për çështjen e njohur si dosja e privatizimit të ish-kompleksit sportiv “Partizani”.
Të pandehur në këtë proces janë ish-kryeministri Sali Berisha dhe dhëndri i tij, Jamarbër Malltezi, të cilët akuzohen nga Prokuroria e Posaçme për veprat penale të “korrupsionit” dhe “pastrimit të produkteve të veprës penale”.
Në një deklaratë për mediat, Jamarbër Malltezi e cilësoi procesin si të pabazë dhe politik.
Ai tha se po bëhet ‘gjueti shtrigash’ dhe se në gjyq do të kërkojë që të vijnë dhe Edi Rama, i cili edhe pse në procedurën e privatizimit të kompleksit “Partizani’ ka 8 firma dhe Berisha asnjë, SPAK nuk guxon ta thërrasë. Gjithashtu kërkon të thirret në GJKKO dhe Taulant Balla i cili ka bërë denoncimin.
“Me urdhrin e Edi Ramës, në kongresin e PS prill 2022, prokurorët politikë të nënshtruar kanë bërë 16 kërkesa në të gjitha institucionet.
Pra, Edi Rama i ka dhënë komandën SPAK-ut dhe menjëherë vepruan dhe unë do përballem me këtë çështje, siç ju kemi treguar e do ju informojmë.
Në thelb, është një çështje pa faj penal pasi nisi me kallëzimin pa bazë të Taulant Ballës, sikur toka ishte e shpronësuar dhe toka del me familje pronare.
Vijon me kallëzimin e rremë të prokurorëve sikur kishte ndonjë ligj apo VKM jonormative, kur në fakt nuk kishte asgjë të tillë e vetë e kanë pranuar sot që asnjë nuk është jonormative, krejt ndryshe nga ligjet dhe VKM-të që bën Rama, siç është ligji për teatrin, 4 VKM për Bollinon, VKM-ja që të vidhte tokën për vëllain e vet apo për çunin e prokurorin dhe për këtë SPAK fshihet.
Më pas nisi për ndryshimet e destinacionit dhe e bukura është se i ka bërë Edi Rama, edhe në 2004, edhe në 2006, apo në 2008, por kur e bën Edi Rama, për SPAK do të thotë heshtje totale.
Do jem në shumicën e seancave, por disa prej tyre edhe mund të mos jem.
Edi Rama duhet të jetë patjetër edhe pse ka diçka, SPAK nuk guxon ta thërrasë as për dëshmitar Ramën.
E kemi kërkuar që gjatë fazës së hetimeve, apo te gjyqtarja e seancës paraprake dhe nuk guxon, nuk guxon as t’i shkruajë emrin.
SPAK ka shkuar deri në mashtrim dhe e ka bërë mashtrimin pjesë të dokumentacionit zyrtar.
Edi Rama ka 8 firma në procedurë, Sali Berisha nuk ka asnjë.
8 ka Rama duke përfshirë që me ndryshimin e destinacionit të 2004, e ka Edi Rama 17 mijë metra, më pas në 2006 – 7000 metra dhe gjithë zonës i bëri zhvillime të reja të parametrave të lartë urban.
Nuk është kjo çështja e privatizimit të Partizanit, Partizani është vjedhur nga vëllai i Ramës, sot e kësaj dite Partizani nuk ka një copë letër – a gjeni ju dot sot një copë letër se si shkoi kjo pronë nga krijimi nga shteti te vëllai i Ramës?
Gjeni dot një copë letër? Nuk ka!
Klubi është vjedhur dhe nuk ka asnjë copë letër.
Ju lutem të kini parasysh, që klubi Partizani sot e kësaj dite vijon të jetë i vjedhur nga vëllai i Edi Ramës, pa asnjë copë letër.
Ndërkohë që pronarët kanë marrë tokën që jetë e mot e kishin të tyrën dhe SPAK edhe sot e kësaj dite nuk tregon dot asnjë dokument se si shteti u bë pronar i kësaj toke – nuk ka asnjë dokument, thjesht e grabiti dhe e vodhi siç del një grabitës në rrugë e të vjedh.
Kështu që Edi Ramën e kemi kërkuar të jetë pjesë, dhe do vazhdojmë ta kërkojmë. Patjetër që do jetë edhe Taulanti, pasi ka bërë kallëzim të rremë, dhe këta nuk e marrin guximin ta hetojnë.
Në burg është Salianji që s’ka bërë fare kallëzim përpara prokurorisë, ndërkohë Taulant Balla ka bërë kallëzim të rremë dhe këta nuk guxojnë.
Ju të gjithë e dini se prej një viti e gjysmë Balla duhet të ishte arrestuar, por akoma jep urdhër Rama dhe nuk bëhet asgjë pa urdhrin e Sulltanit”, u shpreh Malltezi.
Berisha dhe Malltezi kanë mohuar vazhdimisht akuzat, duke i cilësuar ato si sulm politik dhe përndjekje nga mazhoranca në pushtet.
Discussion about this post