Nënkryetari i PD Enkelejd Alibeaj, ka reaguar pas vendimit të gjykatës për të liruar nga burgu katër personat përgjegjës për publikimin e të dhënave personale të mbi 650 mijë shqiptarëve.
Nga selia blu, Alibeaj akuzoi kryeministrin Rama se po mbron krimin dhe vjedhjen e zgjedhjeve, ndërsa shtoi se ka tradhtuar shqiptarët me qëllim të vetëm që të marrë pushtetin.
“Vendimi i sotëm i gjykatës për të liruar 4 personat e akuzuar për nxjerrjen e të dhënave personale të shqiptarëve është dëshmi e qartë se Edi Rama po mbron krimin e vet për vjedhjen e zgjedhjeve. Është gjithashtu e qartë, se vendimi tregon se segmente të drejtësisë mbeten nën ndikimin direkt të Edi Rames dhe i shërbejnë pushtetit të tij të vjedhur”, tha Alibeaj.
Sipas deputetit të PD, që në fillim të skandalit, kryeministri u përpoq ta sfumojë atë, pasi sipas tij është vetë i përfshirë.
“Të dhënat e kartës së identitetit, vendit të punës, numrit të telefonit, pagës së qytetarëve u vodhën për të vjedhur zgjedhjet! Ato janë pjesë e skemës kriminale të patronazhimit për vjedhjen e zgjedhjeve të 25 prillit, në shërbim të pushtetit personal të një njeriu të vetëm, Edi Ramës. Që në fillim të shpërthimit të skandalit, Edi Rama u përpoq ta zvogëlojë përmasën e skandalit, ndërsa sot, me tentakukat e tij në sistemin e drejtësisë, doli hapur dhe liroi 4 personat, që akuzohen zyrtarisht për publikimin e të dhënave”, shtoi ai.
Ndër të tjera, ai shprehet se PD dënon ndërhyrjen e Ramës në vendimin për të liruar vartësit e tij dhe për të mos i shkuar deri në fund skemës kriminale të patronazhimit.
Discussion about this post