Dritan Agolli rrjep sërish shqiptarët, nga sot parkimi në QSUT bëhet 200 lekë

Qytetarët që frekuentojnë Qendrën Spitalore Universitare “Nënë Tereza” janë përballur ditën e sotme me një rritje të papritur të tarifës së parkimit.

Nga 100 lekë që ka qenë deri më tani, tarifa është dyfishuar në 200 lekë për orë, pa asnjë njoftim zyrtar ose paralajmërim publik.

Sipas qytetarëve vendimi ka hyrë në fuqi menjëherë dhe është komunikuar vetëm verbalisht nga punonjësit e sporteleve të parkimit.

“Pershendetje, Duke filluar qe sot parkimi ne QSUT eshte bere 200 leke ora nga 100 leke qe ishte deri me sot. Gjakun jane duke ia pire ketij populli te shkrete. Po sepse une qendroja me pak se 1 ore dhe punonjesi i sportelit me tha qe duke filluar qe sot eshte bere 200 leke.”

Por duhet thënë se pavarësisht tarifës së re, shërbimi në parkimin e QSUT-së lë për të dëshiruar. Iinfrastruktura është e amortizuar, rrugët janë me zhavorr, mungojnë kamerat e sigurisë dhe shpesh është e pamundur të gjendet një vend parkimi.

Ka pasur edhe raste kur ambulancat janë detyruar të presin për të hyrë për shkak të mungesës së një korsie të posaçme dhe trafikut të rënduar brenda ambienteve të parkimit.

Aktualisht, territori i parkimit në QSUT është nën menaxhimin e Fondit Shqiptar të Zhvillimit (FSHZH) me në krye Dritan Agollin dhe qytetarët kërkojnë që ky institucion të: sigurojë kushte minimale për siguri dhe akses, vendosë kufij për numrin e automjeteve në përputhje me kapacitetin e terrenit dhe të një korsi të dedikuar për lëvizjen e ambulancave.

Duhet thënë se në mungesë të alternativave të parkimit në zonë, qytetarët janë të detyruar të përdorin këtë shërbim pavarësisht mungesës së standardeve dhe çmimit të lartë.