Bashkia Tiranë dukshëm zakonet e këqija nuk i ka lënë pas në vitin e vjetër. Skandalet me tendera dhe shkelja e barazisë së garës së tyre e kanë shoqëruar këtë institucion gjatë gjithë vitit 2021, ndaj gjasat janë që e njëjta gjë të ndodh dhe këtë vit. Një tender me “red flag” për shkak të skualifikimit nga gara të të gjithë operatorëve përveç fituesit është konstatuar në dokumentet e publikuara. Bëhet fjalë për tenderin me numër reference REF-14636-12-09-2021, që ka si objekt mirëmbajtjen e sistemit të vlerësimit të performancës. Ky tender ka si fond limit shumën prej 1 440 000 lekë pa TVSH ose rreth 15 milionë lekë të vjetra.
Në garë për këtë tender kanë marrë pjesë tre operatorë, dy nga të cilët janë skualifikuar automatikisht, duke lënë rrugën e hapur për operatorin fitues, i cili është “COMMUNICATION PROGRESS” shpk, objekt i cili ka marrë dhe 3 tendera të tjerë nga Bashkia Tiranë të cilësuara me “red flag”. Dy operatorët e tjerë janë skualifikuar nga gara me argumentimin se nuk kanë paraqitur dokumentacionin e kërkuar. Konkretisht ”SOFT & SOLUTION” SHPK, për këto arsye: Nuk ka paraqitur në spe sigurimin e ofertës sipas shtojcës 3, duke mos përmbushur kështu kriterin 1/b të Kritereve të Veçanta të Kualifikimit. Ndërsa operatori ”iCom” shpk, për këto arsye: Nuk ka paraqitur në spe dokumentacion për përmbushjen e shtojcës 1 pjesë e dokumenteve standarde të tenderit. Mos dorëzimi i dokumentacionit të nevojshëm nga këto operatorë dhe skualifikimi i tyre në mënyre automatike, bën që operatori fitues të mos ketë konkurrencë, duke u shpallur i tillë pa garë, gjë e cila është krejtësisht kundër rregullave të paracaktuara për barazinë në tendera.
Discussion about this post