Pronari i rrjetit të lokaleve, “Stockholm”, Ferhat Kaja akuzohet se ka dhunuar brutalisht biznesmenin konkurent Laert Kasaj, ngjarje e ndodhur mbrëmjen e së martës (22 Korrik) tek Kompleksi “Delijorgji”.
Sipas burimeve, pronari i restorantit “Tokyo”, Laert Kasaj është dhunuar nga biznesmeni Ferhat Kaja, si edhe një person tjetër i afërm i tij, Oltian Kaja, të cilët janë shpallur në kërkim nga policia.
Autorët mësohet se janë pronarë të lokalit “Stockholm”, që ndodhet përballë kompleksit “Delijorgji” ku ndodhi ngjarja dhe ku ndodhet restoranti i Laert Kasajt.
Sipas dëshmitarëve, në momentin e sulmit një nga agresorët i është drejtuar Laert Kasajt me fjalët: “Pse më ke denoncuar?”.
Mësohet se shkak i sherrit ka qenë aksioni i lirimit të hapsirave publike, ku Policia Bashkiake dhe Inspektoriati i Mbrojtjes së Territorit, hoqi tendat e lokaleve dhe strukturat metalike të vendosur prej bizneseve.
Dyshohet se shkak për sherrin ka qenë denoncimi i Laert Kasajt ndaj biznesit të Ferhat Kajat, pikërisht per zaptimin e hapësirës publike.
Për këtë ngjarje Policia ka reaguar me një njoftim të shkurtër vetëm pas 3 ditësh, kur çeshtja është bërë mediatike, teksa e cilëson ngjarjen si të ndodhur për motive të dobëta.
“Specialistët e Komisariatit të Policisë Nr. 2: Shpallën në kërkim shtetasin Ferhat Kaja, 31 vjeç dhe Oltian Kaja, 30 vjeç, pasi me datë 21.07.2025, rreth orës 22:30, në Rrugën e Kavajës, tek kompleksi “Delijorgji” dyshohet për motive të dobëta, në bashkëpunim me njëri-tjetrin, kanë goditur me grushte dyshohet dhe me sende të forta shtetasit E. K dhe Laert Kasaj, të cilët pas marrjes së asistencës mjekësore u larguan për në banesë. Punohet për kapjen e tyre dhe dokumentimin e plotë të rastit”, njoftoi policia.
Policia po vijon hetimet për të zbardhur plotësisht rrethanat e kësaj ngjarjeje dhe është vënë në ndjekje të autorëve të dyshuar.
Në foto, pronari i restorantit Laert Kasaj, i dhunuar me hematoma në fytyrë dhe sy të nxirë
Discussion about this post