Një ngjarje tronditëse ka ndodhur mbrëmjen e sotme në zonën e Skelës në Vlorë, në ambientet e një hoteli të njohur, ku një kamarier është sulmuar brutalisht gjatë orarit të punës, në prani të klientëve vendas dhe të huaj, nga një efektiv policie jashtë detyrës dhe një person me të kaluar kriminale.
Burime nga vendngjarja tregojnë se Ardian Isufi, ish-shef i qarkullimit rrugor të Vlorës, së bashku me Leart Bimon, person me precedent të rëndë penal, kanë ushtruar dhunë fizike dhe verbale ndaj një kamarieri të ri, vetëm pse ai kishte çuar në tavolinë një shishe uji më shumë se porosia.
Sipas dëshmitarëve, Isufi është parë teksa i afrohet kamarierit në mënyrë kërcënuese, ndërsa më pas, Laert Bimo, e sulmon fizikisht disa herë, duke rrezikuar seriozisht shëndetin dhe jetën e të riut. Dhuna është kryer në sy të klientëve që, të tmerruar nga skena, janë larguar menjëherë duke lënë lokalin bosh.
I riu, sapo kishte mbushur 18 vjeç, tregoi se konflikti nisi për një shishe uji, ndërsa ai thjesht po kryente detyrën.
Më tha hiqe ujin dhe i thash ok, vetëm mos shaj e ofendo, sepse edhe ai tjetri pa dashje e ka bërë. Vijnë të dy burrat nga 40 vjeç e sipër më ndoqën deri në banak. I thash të lutem mos kap me dorë. Ishte edhe menaxheri.
Më goditi një herë me shpullë dhe dy herë me grushte. Për një bidon ujë godet tjetri, në fytyrë dhe qafë. Më hodhi edhe syzet mirë që nuk mi theu. Sapo i kam mbushur 18-vjeç”, tha ai.
Ajo që e bën edhe më të rëndë situatën është dyshimi se dhuna mund të ketë qenë e organizuar, me qëllim intimidimin dhe sabotimin e aktivitetit të biznesit. E gjithë kjo ndodh në një qytet turistik, në sezon të lartë, kur qytetarë dhe vizitorë kërkojnë siguri – dhe në vend të saj përballen me dhunë të egër nga njerëz që duhet të ishin garant të ligjit.
Përballë kësaj situate alarmante ku dhunohesh nga ata, prej të cilëve kërkojmë rend dhe siguri, natyrshëm lind edhe pyetja:
Pse hesht shteti ndaj këtyre ngjarjeve skandaloze?
SHÇBA – Pse nuk është pezulluar menjëherë A.I.?
Prokuroria e Vlorës – A do të regjistrojë procedim penal për dhunë, kanosje, dhe cenim të rendit publik?
Policia a do distancohet nga efektivët që njollosin uniformën?
Turizmi në Vlorë – Kush mban përgjegjësi kur një punonjës i ndershëm rrihet para turistëve në mes të lokalit?
Ky nuk është një incident, është një ngjarje dhune ndaj një të riu që ka dalë nga dhtëpia për të siguruar të ardhura familjes ndërsa krimi dhe uniforma ndajnë të njëjtën tavolinë!
Discussion about this post