Qendra Kombëtare Operacionale e Emergjencave Civile (QKOEC) në Agjencinë Kombëtare të Mbrojtjes Civile (AKMC) ka raportuar mbi situatën e zjarreve në vend, duke konfirmuar pesë vatra, nga të cilat tri janë aktive dhe dy janë nën monitorim.
Vatra aktive:
- Malin e Bërzhitës: Zjarri në fshatrat Ibë dhe Durisht të njësisë administrative Bërzhitë dhe Petrelë ndodhet në një terren të vështirë dhe të paarritshëm nga toka. Megjithatë, aktualisht nuk përbën rrezik për banesat apo zonën pyjore.
- Zona e Pezë-Helmës: Zjarri i nisur më 10 gusht në fshatrat Damjan dhe Isufaj të Tiranës dhe i përhapur më pas në zonën e Pezë-Helmës, vazhdon të jetë aktiv në disa vatra të minimizuara. Këto vatra po mbahen nën vëzhgim të vazhdueshëm derisa të fiket plotësisht.
- Kulumri dhe Lumi i Trunit, Fushë-Arrëz: Situata po monitorohet në këto zona. Rreth 50 forca të Forcave të Armatosura (FA) janë angazhuar për të izoluar cungjet që ende digjen dhe për të fikur plotësisht flakët. Situata momentalisht është e qetë, por puna po vijon për të garantuar shuarjen përfundimtare.
Vatra nën monitorim:
- Ternovë, Bulqizë: Vatra e zjarrit po monitorohet nga shtatë efektivë të Mbrojtjes nga Zjarri dhe Shpëtimi (MZSH) për të parandaluar riaktivizimin nga trungjet e thata.
- Parku Natyror Gërmenj, Kolonjë: Situata është më e qetë si rezultat i punës së forcave operacionale dhe reshjeve të shiut që ranë pasditen e djeshme.
Discussion about this post