Deputeti britanik Nigel Farage, paraqiti të shtunën planet për “deportime masive” të migrantëve që kanë kaluar Kanalin Anglez me anije të vogla nëse partia e tij Reform UK formon qeverinë e ardhshme të Britanisë. Farage tha se do ta tërheqë Britaninë nga Konventa Evropiane për të Drejtat e Njeriut dhe do të nënshkruajë marrëveshje me Afganistanin, Eritrean dhe vende të tjera kryesore të origjinës për të riatdhesuar emigrantët e paligjshëm, raporton Reuters.
Deputeti tha se migrantët që vijnë në Britani me anije të vogla duhet të arrestohen me të mbërritur, të ndalohen në bazat e Forcave Ajrore Mbretërore, tu mohohet e drejta e azilit dhe të deportohen brenda 30 ditëve. Gjithashtu, Farage tha se nuk është i shqetësuar për pasojat që mund të përballen azilkërkuesit në vendet e origjinës, por për rrezikun që ai beson se ata paraqesin për qytetarët britanikë.
“Jo vetëm që përbën një kërcënim për sigurinë kombëtare, por po çon në zemërim publik që, sinqerisht, nuk është shumë larg çrregullimit. Nuk mund të jem përgjegjës për regjimet tiranike në botë. Por mund të jem përgjegjës për sigurinë e grave dhe vajzave në rrugët tona,” deklaroi ai.
Projektligji do të përfshijë nënshkrimin e marrëveshjeve me vende si Afganistani dhe Eritrea, dy nga pesë vendet kryesore nga të cilat vijnë shumica e njerëzve që mbërrijnë me anije të vogla, sipas të dhënave nga Ministria e Brendshme. Ndërkohë, vetëm disa kohë më parë Farage, një figurë e njohur e politikës britanike dhe zë i fortë i fushatës së Brexit-it, hyri në një debat publik me kryeministrin Edi Rama, ku kërkoi që gjithë shqiptarët e burgosur në Britani të deportohen. Farage tha se në Britaninë e Madhe shqiptarët janë aktorë kryesorë në kriminalitet, duke pretenduar se 1 në 50 shqiptarë janë në burg.
Të dhënat e Ministrisë së Brendshme e çojnë numrin total të kërkesave për azil në 111,000 në vitin që përfundon në qershor 2025, gjysma e të cilëve mbërritën nëpërmjet “rrugëve të parregullta”. Kjo është më pak se numri i azilkërkuesve në Gjermani, Spanjë, Itali dhe Francë. Shkalla e dhënies së azilit ishte 48 përqind gjatë asaj periudhe. Sipas të dhënave, rreth 43,000 njerëz mbërritën me varka të vogla në të njëjtën periudhë.
Discussion about this post