Prokuroria e Tiranës ka sekuestruar 18 pasuri të paluajtshme, llogari bankare dhe dy automjete luksoze në pronësi të Kristian Konit, i cili është arrestuar më parë në Itali për trafik droge. Hetimet kanë zbuluar se Konit dhe nëna e tij, e cila është në pension, kanë kryer veprimtari të lidhura me rrjetin e strukturuar kriminal të trafikut të narkotikëve në Itali gjatë periudhës 2007–2012. Ai ka përdorur identitete të ndryshme dhe ka kryer transaksione financiare të pajustifikuara në raport me të ardhurat e ligjshme të deklaruara.
Pasuritë e sekuestruara përfshijnë prona në Tiranë, Bathore, Farkë dhe Marikaj, dy automjete luksoze të llojit Range Rover dhe Smart, si dhe llogaritë bankare të personave fizikë dhe juridikë të përfshirë në hetim. Në mesin e tyre është edhe kompania “Kriol.AL” sh.p.k., me përfaqësues ligjor Kristian Konin.
Sipas disa raportimeve mediatike, Koni, i njohur gjithashtu si Olsi Meta, ka ndërtuar një rrjet biznesesh dhe ka investuar paratë e trafikut të narkotikëve kryesisht në fushën imobilare, duke blerë troje, godina dhe apartamente në Tiranë dhe zonat bregdetare. Hetimet tregojnë se aktiviteti i tij nuk ka qenë vetëm me letra për bilance, por përfshinte një zinxhir kompanish që kryesisht shërbenin për pastrim parash.
Në vitin 2021, ai themeloi firmën Kriol.al, me objekt eksportin e automjeteve, shit-blerjen e pasurive të paluajtshme, reklamim për kompani kombëtare dhe ndërkombëtare, si dhe aktivitet në internet, televizion, konsulenca menaxheriale, tregti frutash e perimesh dhe pjesëmarrje në kuota. Ndërkohë, në vitin 2023 themeloi kompaninë Azul Rooms, që merret me dhënie apartamentesh me qira, konsulencë marketingu dhe brokerim. Hetimet tregojnë se shumë nga këto aktivitete nuk kanë qenë reale, por kanë shërbyer për të krijuar fatura të pafundme dhe për të justifikuar lëvizjet e parave.
Bilancet e fundit të kompanisë Kriol.al tregojnë se pavarësisht xhiros së lartë, fitimet reale kanë qenë minimale, duke mbështetur dyshimet për pastrim parash. Përveç pasurive të paluajtshme dhe automjeteve, Konit dyshohet se ka përvetësuar prona të tjera si troje, vila, hotele dhe apartamente përmes rrjetit të tij të biznesit, duke përdorur edhe ndërmjetës dhe persona të tjerë për të fshehur origjinën e të ardhurave.
Discussion about this post