Ndeshja mes Serbisë dhe Anglisë nuk ka qenë një katastrofë vetëm në aspektin sportiv për serbët. Të turpëruar në fushën e lojës me 5 gola përballë publikut të tyre, ata kanë shijuar një humbje të rëndë për moralin, por edhe për të ardhmen. Dhe sigurisht, tifozët e pandreqshëm serbë kanë bërë të tyren për të përkeqësuar gjendjen.
Para ndeshjes ndaj Anglisë, e cila është luajtur me stadium me kapacitet të kufizuar për shkak të dënimit për sjellje raciste dhe thirrjet antishqiptare në ndeshjet e mëparshme të Serbisë, federata vendase kishte bërë thirrje pa fund që të shmangej çdo incident pasi UEFA i kishte nën monitorim.
Por gjatë takimit, incidentet nuk munguan dhe kishte shumë të tilla që u pasqyruan gjerësisht në mediat ndërkombëtare. Thirrje raciste dhe antishqiptare nga tribunat, kore për Kosovën, por edhe sherre u konstatuan gjatë gjithë ndeshjes. Në disa momente, kishte përplasje mes grupeve të tifozëve serbë në tribunë, ndërsa njëri syresh u kap nga policia teksa po tentonte t’u vërsulej mbështetësve anglezë në stadium.
Gjyqtari ndërkohë u detyrua të ndalte takimin dhe të bëhej thirrje që të ndalej përdorimi i lazerave, pasi një prej tyre po bezdiste vazhdimisht Konsa të Anglisë.
Të gjitha incidente të njëpasnjëshme të cilat janë shënuar nga delegati i caktuar nga UEFA, çeku Emil Ubias dhe pritet të raportohen për shqyrtim në komisionin disiplinor për këtë çështje. Edhe pse nën mbikëqyrjen e UEFA-s, vendimet për situatën në fjalë i merr FIFA që është përgjegjëse për kualifikueset, ndaj nuk pritet të ketë “favorizim rajonal” siç ka ndodhur shpesh me Serbinë në të kaluarën.
Kjo ka rritur panikun në opinionin sportiv vendas se do të ketë një dënim të rëndë të përshkallëzuar në takimin e radhës me luajtjen e ndeshjes pa praninë e tifozëve. Dhe ndeshja e radhës është pikërisht ajo më delikatja ndaj Shqipërisë. Dy skuadrat përballen më 11 tetor në Beograd për një finale për vendin e dytë në grup dhe sipas vetë mediave serbe, ekziston një mundësi reale tashmë që po diskutohet që tani në ambientet e Federatës Serbe, që të përgatitet ky takim pa mbështetjen e tifozëve në tribuna
Discussion about this post